Jizzax shahrida yo‘l harakati qoidalarini buzgan haydovchini YPX xodimi haqorat qilgani haqida xabar berilgandi. Jizzax viloyati IIB tomonidan ushbu xodimga nisbatan xizmat tekshiruvi o‘tkazildi.
Qayd etilishicha, 2021-yilning 12-aprel kuni Jizzax viloyati IIB YHXB YPX xodimlari Z.P., Z G‘. va Sh.M. Jizzax shahar Islom Karimov shohko‘chasida tungi xizmatni olib borayotgan vaqtida YPX inspektori Sh.Murodov tomonidan “VAZ-2108” mashinasi haydovchisi yo‘l harakati qoidalarining 99-bandida belgilangan talablarga amal qilmasdan harakatlanganligi bois to‘xtatilgan.
YPX xodimi haydovchidan me’yoriy hujjatlarni taqdim qilishini so‘raganda haydovchi hujjatlarni taqdim eta olmagan. Haydovchi A.J.ga nisbatan belgilangan tartibda ma’muriy bayonnoma tuzilib, “VAZ-2108” vaqtincha saqlash uchun jarima maydonchasiga maxsus evakuator yordamida olib ketilayotganda haydovchi YPX xodimiga e’tiroz bildirib, qarshilik ko‘rsatgan. YPX inspektori Sh.Murodov haydovchi bilan muloqot jarayonida nosamimiy munosabatda bo‘lgan.
Xizmat tekshiruvi xulosasiga ko‘ra, xizmat faoliyati davomida Vazirlar Mahkamasining 2018-yil 1-dekabrdagi 975-sonli qarori bilan tasdiqlangan “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida”gi nizom hamda ichki ishlar vazirining ayrim me’yoriy buyruqlari talablarini buzganligi uchun Jizzax viloyati IIB YHXB YPX xodimi Sh.Murodov egallab turgan lavozimidan ozod etildi.
Bundan avval Samarqandda haydovchiga xizmat guvohnomasini taqdim etishni istamagan YPX xodimiga xizmat tekshiruvi tayinlangani, Qoraqalpog‘istonda haydovchiga qo‘l ko‘targan YPX xodimiga nisbatan xizmat tekshiruvi o‘tkazilayotgani hamda Toshkentda quvvati tugaganini aytib, ishlamayotgan bodikamera bilan tekshiruv o‘tkazgan YPX xodimiga chora ko‘rilgani haqida xabar qilingandi.
Izoh (0)