DXX Xorazm viloyati boshqarmasi va viloyat ichki ishlar boshqarmasi xodimlari tomonidan o‘tkazilgan tezkor tadbirda uch nafar qizni Dubayga fohishalik qilish uchun jo‘natishga uringan shaxslar qo‘lga olindi, deb xabar beradi “Xabar.uz”.
Ma’lum qilinishicha, Urganch shahrida yashovchi 35 yoshli V.S. va uning Qo‘shko‘pir tumanida istiqomat qiluvchi 42 yoshli qarindoshi S.V. xorazmlik 1998-yil tug‘ilgan K.Z., 1998-yil tug‘ilgan J.O. va 2000-yil tug‘ilgan R.X.ning ishonchiga kirib, ularni fohishalik bilan shug‘ullanish uchun Birlashgan Arab Amirliklarga yuborishni rejalashtirgan.
O‘tkazilgan tezkor tadbir davomida V.S. hamda S.V. qizlarni Urganch shahridan Toshkent shahriga avtomashinada jo‘natayotgan vaqtida ushlangan.
Aniqlanishicha, K.Z., J.O. va R.X. o‘zlarining nomiga Toshkent—Dubay yo‘nalishi bo‘yicha sotib olingan aviachipta hamda rasmiylashtirilgan viza xarajatlarini Dubay shahrida ishlab, pul topganlaridan so‘ng to‘lab berishlari kerak bo‘lgan.
Tergovga qadar tekshiruv harakatlari davomida V.S. BAAdagi jinoiy aloqalari buyurtmasiga ko‘ra, muqaddam bir nechta ayollarni fohishalik bilan shug‘ullantirish uchun Dubay shahriga yuborgani ham ma’lum bo‘lgan.
Hozirda V.S. va S.V.larga nisbatan Jinoyat kodeksining 135-moddasi (odam savdosi) bilan jinoyat ishi qo‘zg‘atilib, tergov harakatlari olib borilmoqda.
Avvalroq Samarqandda 37 yoshli ayolni 1000 dollar evaziga Turkiyaga fohishalik uchun sotgan erkak ushlangani, Navoiyda 3 yoshli farzandini 60 mln so‘mga sotmoqchi bo‘lgan ayol ushlangani, Navoiyda fuqaroni fohishalikka yollab, uni Qirg‘iziston orqali Turkiyaga jo‘natmoqchi bo‘lgan ayolga jinoyat ishi qo‘zg‘atilgani hamda Toshkent xalqaro aeroportida fuqaroni xorijga fohishalik qilish uchun jo‘natayotgan 20 yoshli qiz va uning sherigi ushlangani haqida xabar berilgandi.
Izoh (0)