Sirdaryodagi daladan butunlay yonib ketgan erkak jasadi topildi. Holat yuzasidan jinoyat ishi qo‘zg‘atildi

Sirdaryodagi dalalardan birida 100 foiz kuyib ketgan jasad topildi, yonidagi Cobalt’ga hech nima qilmagan, deb xabar bermoqda “Sirdaryo xabarlari”.

Qayd etilishicha, qotillik 28-may kuni kunduzi Mirzaobod tumani hududida sodir bo‘lgan. Jasad yonida Cobalt ham topilgan bo‘lib, avtomobilga shikast yetkazilmagan.

Bosh prokuratura matbuot xizmatining xabar berishicha, ushbu holat yuzasidan Jinoyat kodeksining 97-moddasi 2-qismi “j” bandi (o‘ta shafqatsizlik bilan qasddan odam o‘ldirish) bilan jinoyat ishi qo‘zg‘atildi.

Hozirda Sirdaryo viloyati prokuraturasi va Ichki ishlar boshqarmasining malakali xodimlaridan iborat tezkor tergov guruhi tomonidan jinoyatni fosh etish choralari ko‘rilmoqda.

Bosh prokuratura matbuot xizmati “Daryo.uz” so‘roviga asosan ma’lum qilishicha, murda Toshkent shahri, Uchtepa tumanida yashovchi, kirakash bo‘lib ishlovchi 47 yoshli F.P. ekanligi aniqlangan. Jasad 28-may kuni soat 19:00 larda M-34 Toshkent—Dushanbe avtomobil yo‘lining Mirzaobod tumani, “Yangi hayot” MFY hududidan o‘tuvchi 136-kilometridagi tuman hokimligi zaxira yer maydonidan topilgan.

Sudga oid tibbiyot ekspertizasining dastlabki xulosasiga ko‘ra, marhumning o‘limi tanasining 100 foiz kuyishi oqibatida kelib chiqqanligi aniqlangan.