Сирдарёдаги даладан бутунлай ёниб кетган эркак жасади топилди. Ҳолат юзасидан жиноят иши қўзғатилди

Сирдарёдаги далалардан бирида 100 фоиз куйиб кетган жасад топилди, ёнидаги Cobalt’га ҳеч нима қилмаган, деб хабар бермоқда «Сирдарё хабарлари».

Қайд этилишича, қотиллик 28 май куни кундузи Мирзаобод тумани ҳудудида содир бўлган. Жасад ёнида Cobalt ҳам топилган бўлиб, автомобилга шикаст етказилмаган.

Бош прокуратура матбуот хизматининг хабар беришича, ушбу ҳолат юзасидан Жиноят кодексининг 97-моддаси 2-қисми «ж» банди (ўта шафқатсизлик билан қасддан одам ўлдириш) билан жиноят иши қўзғатилди.

Ҳозирда Сирдарё вилояти прокуратураси ва Ички ишлар бошқармасининг малакали ходимларидан иборат тезкор тергов гуруҳи томонидан жиноятни фош этиш чоралари кўрилмоқда.

Бош прокуратура матбуот хизмати «Daryo.uz» сўровига асосан маълум қилишича, мурда Тошкент шаҳри, Учтепа туманида яшовчи, киракаш бўлиб ишловчи 47 ёшли Ф.П. эканлиги аниқланган. Жасад 28 май куни соат 19:00 ларда М-34 Тошкент—Душанбе автомобиль йўлининг Мирзаобод тумани, «Янги ҳаёт» МФЙ ҳудудидан ўтувчи 136-километридаги туман ҳокимлиги захира ер майдонидан топилган.

Судга оид тиббиёт экспертизасининг дастлабки хулосасига кўра, марҳумнинг ўлими танасининг 100 фоиз куйиши оқибатида келиб чиққанлиги аниқланган.