Toshkentning Sergeli va Yakkasaroy tumanlarini bir-biriga bog‘laydigan yo‘l loyihasi doirasida Kichik halqa yo‘li ustidan ko‘prik qurilayotgani sababli yo‘l qatnov qismining o‘lchamlari ikki oyga o‘zgartiriladi. Bu haqda Toshkent shahar hokimligi matbuot xizmati ma’lum qildi.
“Usmon Nosir 2-tor ko‘chasining Kichik halqa yo‘li bilan kesishgan qismida qatnov qismining umumiy eni 10 metrni, balandligi 4,5 metrni tashkil qiladi. Transport qatnovi ikki tomonlama bo‘ladi. Ushbu yo‘l qismidan o‘tayotganda noqulayliklarning oldini olish uchun haydovchilardan transport vositalari va yuklarning o‘lchamlarini inobatga olishlarini so‘raymiz”, — deyiladi hokimlik axborotida.
Ma’lumot uchun, Cho‘ponota ko‘chasi, Kichik halqa yo‘li, Toshkent halqa avtomobil yo‘li va Sergelidagi Qipchoq ko‘chasini birlashtiruvchi 5,6 kilometrlik yo‘l qurilishi (yo‘lda uchta yo‘l o‘tkazgich bo‘lishi ko‘zda tutilgan) 2020 yil avgust—sentabrida boshlangan edi. Dastlab loyiha qiymati 280 milliard so‘mga baholangan edi, biroq, so‘nggi ma’lumotlarga ko‘ra, loyiha bahosi 518,3 milliard so‘mgacha oshgan.
Qayd etish joiz, qurilayotgan bu yo‘l dastlabki reja bo‘yicha 2021-yil may oyida foydalanishga topshirilishi kerak edi.
Izoh (0)