O‘zbekiston Respublikasi Sog‘liqni saqlash vazirligi buyrug‘i bilan Qashqadaryoga yuborilgan 15 nafar tibbiyot xodimining olti oylik ish faoliyati yakunlandi. Bu haqda “Daryo”ga xabar bergan viloyat Sog‘liqni saqlash boshqarmasi axborot xizmati rahbari Nuriddin Egamovning yozishicha, faoliyatini yakunlagan 15 nafar tibbiyot xodimi hurmat-ehtirom bilan kuzatilgan.
“Shu munosabat bilan viloyat Sog‘liqni saqlash boshqarmasi tomonidan tashkil etilgan kuzatish marosimida ularning yarim yil davomida Qashqadaryoda olib borgan faoliyatlari sarhisob qilinib, xizmatlari alohida e’tirof etildi”, — deydi Nuriddin Egamov.
Qayd etilishicha, Prezidentning sohaga doir qarorlari va tegishli videoselektor yig‘ilishi bayoni ijrosini viloyatda namunali tashkil etish maqsadida shahar va tuman tibbiyot birlashmalariga poytaxtdagi ixtisoslashtirilgan ilmiy-amaliy tibbiyot markazlari hamda tibbiyot yo‘nalishlaridagi oliy o‘quv yurtlarida faoliyat yuritayotgan, yuqori ilmiy salohiyatga ega bo‘lgan malakali mutaxassislar 2020-yil 26-noyabrdan vohada ish boshlagan.
Ta’kidlanishicha, vazirlik buyrug‘i bilan viloyatga yuborilgan 15 nafar tibbiyot xodimi zimmasiga tibbiyot muassasalari faoliyatini tanqidiy o‘rganib chiqib, davolash-profilaktika, shu jumladan, birlamchi tibbiy-sanitariya muassasalari faoliyatini tubdan yaxshilash vazifasi yuklatilgan. Shuningdek, muassasa faoliyatini tizimli tahlil qilishda zamonaviy axborot-kommunikatsiya texnologiyalarini joriy etish, bemorlarga qulay sharoit yaratishga qaratilgan tadbirlarni amalga oshirish, diagnostika va davolash jarayonlarini maqbullashtirish, respublika muassasalari bilan uzviy aloqada ishlarni tashkillashtirish singari bir qator vazifalar yuklatilgan.
“Yaqinda sog‘liqni saqlash sohasidagi islohotlar samaradorligini oshirish masalalari bo‘yicha o‘tkazilgan videoselektor yig‘ilishida Prezidentimiz Kitob tumanidagi xatlov natijasida bir oy ichida uchinchi va to‘rtinchi guruhga mansub 20 turdan ortiq kasalliklar bo‘yicha 1,5 ming nafar bemorga joyida kerakli yordam ko‘rsatilgani sabab viloyat va respublika shifoxonalariga murojaat ikki baravarga kamayganini ta’kidladi. Bu e’tirof bizni juda quvontirdi. Hududga biriktirilgan mas’ul sifatida tibbiy xatlov jarayonini samarali tashkil etish, respublikadagi markazlar bilan aloqalarni mustahkamlash, ‘mahorat darslari’ tarzidagi murakkab jarrohlik amaliyotlarini viloyatning o‘zida tashkil etishga alohida e’tibor qaratdik”, — deydi Kitob tumaniga biriktirilgan vakil, Respublika ixtisoslashtirilgan travmatologiya va ortopediya ilmiy-amaliy tibbiyot markazi katta ilmiy xodimi, tibbiyot fanlari doktori Ahmad Dursunov.
Tadbirda viloyat hokimi o‘rinbosari Rustam Yo‘ldoshev hamda viloyat Sog‘liqni saqlash boshqarmasi boshlig‘i Ravshan To‘lakov qatnashib, tibbiyot xodimlariga viloyatda tibbiyotni rivojlantirish sohasidagi xizmatlari uchun minnatdorlik izhor qilgan. Hamda boshqarma faxriy yorliqlar va qimmatbaho sovg‘alarni topshirgan.
Izoh (0)