O‘zbekiston davlat bojxona qo‘mitasi xodimlari tilla quyma bo‘laklarini noodatiy usulda mamlakatdan olib chiqishga uringan shaxs faoliyatiga chek qo‘ydi. Bu haqda qo‘mita axborot xizmati xabar berdi.
Qayd etilishicha, mamlakatdan xorijga yo‘l olgan fuqaro N.M.ning xatti-harakatlari bojxona xodimlari e’tiborini tortgan.
Shundan so‘ng ushbu shaxs Bodyscanner uskunasi yordamida bojxona ko‘rigidan o‘tkazilgan.
Natijada fuqaro o‘z og‘iz bo‘shlig‘iga 163 grammlik tilla quymalarini tish uchun qoplama shakliga keltirib joylagani va shu tariqa bojxona nazoratidan yashirishga uringanligi aniqlandi.
Hozirda umumiy qiymati 94,7 million so‘mga teng bo‘lgan quyma metall bo‘laklari vaqtincha saqlovga olinib, holat yuzasidan bojxona organlari tomonidan surishtiruv harakatlari olib borilmoqda.
Bundan avval Namanganda umumiy qiymati 2 milliard so‘mlik dori vositalarini mamlakat hududiga olib kirgan shaxslar ushlangani, DXX Qozog‘istonga 1 million dollarga yaqin valyutani noqonuniy olib chiqishga uringan poyezd mashinistlarini qo‘lga olgani hamda Toshkentda radioaktiv material sotmoqchi bo‘lgan uch kishi qo‘lga olingani haqida xabar berilgandi.
Izoh (0)