Ўзбекистон Республикаси Соғлиқни сақлаш вазирлиги буйруғи билан Қашқадарёга юборилган 15 нафар тиббиёт ходимининг олти ойлик иш фаолияти якунланди. Бу ҳақда «Дарё»га хабар берган вилоят Соғлиқни сақлаш бошқармаси ахборот хизмати раҳбари Нуриддин Эгамовнинг ёзишича, фаолиятини якунлаган 15 нафар тиббиёт ходими ҳурмат-эҳтиром билан кузатилган.
«Шу муносабат билан вилоят Соғлиқни сақлаш бошқармаси томонидан ташкил этилган кузатиш маросимида уларнинг ярим йил давомида Қашқадарёда олиб борган фаолиятлари сарҳисоб қилиниб, хизматлари алоҳида эътироф этилди», — дейди Нуриддин Эгамов.
Қайд этилишича, Президентнинг соҳага доир қарорлари ва тегишли видеоселектор йиғилиши баёни ижросини вилоятда намунали ташкил этиш мақсадида шаҳар ва туман тиббиёт бирлашмаларига пойтахтдаги ихтисослаштирилган илмий-амалий тиббиёт марказлари ҳамда тиббиёт йўналишларидаги олий ўқув юртларида фаолият юритаётган, юқори илмий салоҳиятга эга бўлган малакали мутахассислар 2020 йил 26 ноябрдан воҳада иш бошлаган.
Таъкидланишича, вазирлик буйруғи билан вилоятга юборилган 15 нафар тиббиёт ходими зиммасига тиббиёт муассасалари фаолиятини танқидий ўрганиб чиқиб, даволаш-профилактика, шу жумладан, бирламчи тиббий-санитария муассасалари фаолиятини тубдан яхшилаш вазифаси юклатилган. Шунингдек, муассаса фаолиятини тизимли таҳлил қилишда замонавий ахборот-коммуникация технологияларини жорий этиш, беморларга қулай шароит яратишга қаратилган тадбирларни амалга ошириш, диагностика ва даволаш жараёнларини мақбуллаштириш, республика муассасалари билан узвий алоқада ишларни ташкиллаштириш сингари бир қатор вазифалар юклатилган.
«Яқинда соғлиқни сақлаш соҳасидаги ислоҳотлар самарадорлигини ошириш масалалари бўйича ўтказилган видеоселектор йиғилишида Президентимиз Китоб туманидаги хатлов натижасида бир ой ичида учинчи ва тўртинчи гуруҳга мансуб 20 турдан ортиқ касалликлар бўйича 1,5 минг нафар беморга жойида керакли ёрдам кўрсатилгани сабаб вилоят ва республика шифохоналарига мурожаат икки бараварга камайганини таъкидлади. Бу эътироф бизни жуда қувонтирди. Ҳудудга бириктирилган масъул сифатида тиббий хатлов жараёнини самарали ташкил этиш, республикадаги марказлар билан алоқаларни мустаҳкамлаш, ‘маҳорат дарслари’ тарзидаги мураккаб жарроҳлик амалиётларини вилоятнинг ўзида ташкил этишга алоҳида эътибор қаратдик», — дейди Китоб туманига бириктирилган вакил, Республика ихтисослаштирилган травматология ва ортопедия илмий-амалий тиббиёт маркази катта илмий ходими, тиббиёт фанлари доктори Аҳмад Дурсунов.
Тадбирда вилоят ҳокими ўринбосари Рустам Йўлдошев ҳамда вилоят Соғлиқни сақлаш бошқармаси бошлиғи Равшан Тўлаков қатнашиб, тиббиёт ходимларига вилоятда тиббиётни ривожлантириш соҳасидаги хизматлари учун миннатдорлик изҳор қилган. Ҳамда бошқарма фахрий ёрлиқлар ва қимматбаҳо совғаларни топширган.
Изоҳ (0)