Shavkat Mirziyoyevning “Osiyo taraqqiyot banki va Osiyo infratuzilmaviy investitsiyalar banki ishtirokida ‘O‘zbekiston Respublikasida koronavirus COVID-19 infeksiyasiga qarshi shoshilinch choralarni ko‘rish’ loyihasini amalga oshirish chora-tadbirlari to‘g‘risida”gi qarori qabul qilindi.
Qaror bilan “O‘zbekiston Respublikasida koronavirus COVID-19 infeksiyasiga qarshi shoshilinch choralarni ko‘rish” loyihasining maqsadli ko‘rsatkichlari tasdiqlandi.
Unga ko‘ra:
- xalqaro standartlarga javob beruvchi 7 ta Milliy referens laboratoriya yaratiladi;
- Sanitariya-epidemiologiya xizmatining markaziy apparati, hududiy boshqarmalari, tuman (shahar) bo‘limlarida faoliyat yuritayotgan 17 ming 554 nafar xodimning malakasi oshiriladi;
- 475 ta sanitariya-epidemiologiya xizmati muassasalari rekonstruksiya qilinadi, kapital ta’mirlanadi va jihozlanadi;
- COVID-19 infeksiyasini aniqlash uchun test hajmi amaldagi ko‘rsatkichga nisbatan ko‘paytirilib, 500 mingta test sinovi o‘tkaziladi;
- respublikada tez tibbiy yordam xizmatining moddiy-texnik bazasini yanada mustahkamlash uchun 2021-yil 1-oktabrga qadar 1000 ta tez tibbiy yordam maxsus avtotransport vositasi xarid qilinadi.
Bundan avval O‘zbekiston tez tibbiy yordam xizmatida Damas’lardan butunlay voz kechish rejalashtirilayotgani hamda O‘zbekistonda tez yordamning bitta chaqirig‘i uchun necha pul ajratilayotgani ma’lum qilingani haqida xabar berilgandi.
Izoh (0)