Ramatov, Qo‘chqorov, “Qishloq Qurilish Invest” bir oy muddatda Osiyo taraqqiyot bankidan qo‘shimcha berilgan 50 million dollar hisobidan aholi eng zich, uy-joyga talab yuqori bo‘lgan tumanlarni belgilab, kamida 3 mingta xonadonga ega ko‘p qavatli uylar qurishni boshlaydi. Bu haqda Prezident Shavkat Mirziyoyev raisligida o‘tkazilgan yig‘ilishda davlat rahbari so‘z yuritdi, deya xabar bermoqda “Daryo” muxbiri.
“Ramatov, Zokirov, Adiz Boboyev viloyat, tuman va shahar hokimlari bilan birga yangi qurilayotgan 183 ta massivning infratuzilma bilan bog‘liq muammolarini to‘liq hal qilib berishi zarur.
Yangi qurilayotgan turar joy massivlariga 185 kilometr ichimlik suvi, 290 kilometr oqova tizimi, 130 kilometr elektr, 110 kilometr tabiiy gaz tarmoqlari zarur. Bunga talab etiladigan 415 milliard so‘m mablag‘larning manbalari to‘liq hal etilgan.
Ramatov viloyat, tuman va shahar hokimlari bilan birga ikki hafta muddatda ushbu massivlar infratuzilmasi bilan bog‘liq loyiha hujjatlarini yakunlab, ishlarni boshlasin.
Ramatov, Qo‘chqorov, ‘Qishloq Qurilish Invest’ bir oy muddatda Osiyo taraqqiyot bankidan qo‘shimcha berilgan 50 million dollar hisobidan aholi eng zich, uy-joyga talab yuqori bo‘lgan tumanlarni belgilab, kamida 3 mingta xonadonga ega ko‘p qavatli uylar qurishni boshlasin.
Shu bilan birga, bugungi kunga qadar boshlang‘ich badal uchun subsidiya so‘ragan 27,5 mingta murojaat bo‘yicha, faqatgina 4 mingta arizaga ijobiy xulosa berilgan (73 milliard so‘m yoki 8 foiz subsidiya berilgan, xolos).
Hozirda 5,5 mingta ariza rad etilgan, 18 mingtasi o‘rganilmoqda. Sababi, uy-joy sotib olish uchun fuqarolarga subsidiya to‘lashning amaldagi tartibi bo‘yicha arizani ko‘rib chiqishga 25 kungacha vaqt ketadi.
Qo‘chqorov, Ishmetov, Davletov ikki hafta muddatda subsidiya bo‘yicha murojaatlarni ko‘rib chiqish muddatini 10 kundan 3 kungacha, kelishiladigan tashkilotlarni 9 tadan 5 taga qisqartirsin.
Shuningdek, Ishmetov, Markaziy bank (Ayubxon Kamolov) bir oy ichida barcha hududlarga shaxsan o‘zi chiqib, aholiga subsidiya berish tartibini tushuntirsin va bu bilan bog‘liq muammolarni joyida hal qilsin”, — dedi Prezident.
Bundan avval Shavkat Mirziyoyev “Obod qishloq” va “Obod mahalla” dasturlarini amalga oshirishda qoloqliklar mavjud hududlarga Prezident Administratsiyasi va hukumat vakillarini biriktirgani, Shavkat Mirziyoyev “Shaffof qurilish” tizimi orqali bir oyda qancha mablag‘ iqtisod qilinganini aytgani hamda Shavkat Mirziyoyev “Obod qishloq” va “Obod mahalla” dasturlari ijrosini tanqid qilgani haqida xabar berilgandi.
Izoh (0)