Шавкат Мирзиёев аҳоли энг зич, уй-жойга талаб юқори бўлган туманларни аниқлаб, камида 3 мингта хонадонга эга кўп қаватли уйлар қуришни буюрди

Раматов, Қўчқоров, «Қишлоқ Қурилиш Инвест» бир ой муддатда Осиё тараққиёт банкидан қўшимча берилган 50 миллион доллар ҳисобидан аҳоли энг зич, уй-жойга талаб юқори бўлган туманларни белгилаб, камида 3 мингта хонадонга эга кўп қаватли уйлар қуришни бошлайди. Бу ҳақда Президент Шавкат Мирзиёев раислигида ўтказилган йиғилишда давлат раҳбари сўз юритди, дея хабар бермоқда «Дарё» мухбири.

«Раматов, Зокиров, Адиз Бобоев вилоят, туман ва шаҳар ҳокимлари билан бирга янги қурилаётган 183 та массивнинг инфратузилма билан боғлиқ муаммоларини тўлиқ ҳал қилиб бериши зарур.

Янги қурилаётган турар жой массивларига 185 километр ичимлик суви, 290 километр оқова тизими, 130 километр электр, 110 километр табиий газ тармоқлари зарур. Бунга талаб этиладиган 415 миллиард сўм маблағларнинг манбалари тўлиқ ҳал этилган.

Раматов вилоят, туман ва шаҳар ҳокимлари билан бирга икки ҳафта муддатда ушбу массивлар инфратузилмаси билан боғлиқ лойиҳа ҳужжатларини якунлаб, ишларни бошласин.

Раматов, Қўчқоров, ‘Қишлоқ Қурилиш Инвест’ бир ой муддатда Осиё тараққиёт банкидан қўшимча берилган 50 миллион доллар ҳисобидан аҳоли энг зич, уй-жойга талаб юқори бўлган туманларни белгилаб, камида 3 мингта хонадонга эга кўп қаватли уйлар қуришни бошласин.

Шу билан бирга, бугунги кунга қадар бошланғич бадал учун субсидия сўраган 27,5 мингта мурожаат бўйича, фақатгина 4 мингта аризага ижобий хулоса берилган (73 миллиард сўм ёки 8 фоиз субсидия берилган, холос).

Ҳозирда 5,5 мингта ариза рад этилган, 18 мингтаси ўрганилмоқда. Сабаби, уй-жой сотиб олиш учун фуқароларга субсидия тўлашнинг амалдаги тартиби бўйича аризани кўриб чиқишга 25 кунгача вақт кетади.

Қўчқоров, Ишметов, Давлетов икки ҳафта муддатда субсидия бўйича мурожаатларни кўриб чиқиш муддатини 10 кундан 3 кунгача, келишиладиган ташкилотларни 9 тадан 5 тага қисқартирсин.

Шунингдек, Ишметов, Марказий банк (Аюбхон Камолов) бир ой ичида барча ҳудудларга шахсан ўзи чиқиб, аҳолига субсидия бериш тартибини тушунтирсин ва бу билан боғлиқ муаммоларни жойида ҳал қилсин», — деди Президент.

Бундан аввал Шавкат Мирзиёев «Обод қишлоқ» ва «Обод маҳалла» дастурларини амалга оширишда қолоқликлар мавжуд ҳудудларга Президент Администрацияси ва ҳукумат вакилларини бириктиргани, Шавкат Мирзиёев «Шаффоф қурилиш» тизими орқали бир ойда қанча маблағ иқтисод қилинганини айтгани ҳамда Шавкат Мирзиёев «Обод қишлоқ» ва «Обод маҳалла» дастурлари ижросини танқид қилгани ҳақида хабар берилганди.