Shavkat Mirziyoyev O‘zbekistonning 14 ta shahridagi minglab ko‘p qavatli uy-joylarga xizmat ko‘rsatish boshqaruv-servis kompaniyalariga berilishini aytdi

Prezident Shavkat Mirziyoyev raisligida o‘tkazilgan yig‘ilishda davlat rahbari uy–joy kommunal xo‘jalik vaziri Sherzod Hidoyatov viloyat, tuman va shahar hokimlari bilan birga ko‘p kvartirali uylarga xizmat ko‘rsatish sifatini oshirish uchun ularga boshqaruv-servis kompaniyalarni jalb etishi lozimligini ta’kidladi. Bu haqda “Daryo” muxbiri xabar bermoqda.

“Masalan, Yunusobodda 269 ta shirkatni (1 mingta ko‘p qavatli uy) 12 ta boshqaruv-servis kompaniyalariga biriktirish hisobiga avariya holatlari 60 foizga, muddati o‘tgan qarzdorlik 25 foizga qisqargan, 1,4 milliard so‘m bank krediti qaytarilgan.

Ushbu tumanda 110 ta ko‘p qavatli uy–joyga 25 ta shirkat (194 ta ishchi) qilgan ishlarni, bugungi kunda 54 ta ishchisi bo‘lgan 1 ta boshqaruv kompaniyasi amalga oshirmoqda. Shu bilan birga, boshqaruv kompaniyasi qo‘shimcha 9 ta maktab va bog‘cha hamda 50 ta tadbirkorlik subyektlarini qamrab olgan.

Shirkatlarda uy-joylarni saqlash tarifining 35 foizi ish haqiga ketgan bo‘lsa, boshqaruv kompaniyasi ishchilariga oylikni 2 baravarga oshirganda ham, bu ko‘rsatkich 7–8 foizni tashkil qilmoqda. 2020-yilda ish haqidan 324 million so‘m iqtisod qilgan.

Shu bois Sh.Hidoyatov viloyat hokimlari bilan birga ikki oy muddatda tajriba tariqasida Nukus (56 ta uy), Andijon (134 ta), Buxoro (45 ta), Jizzax (54 ta), Qarshi (54 ta), Navoiy (101 ta), Namangan (103 ta), Samarqand (47 ta), Termiz (109 ta), Guliston (85 ta), Urganch (60 ta) Farg‘ona (90 ta), Chirchiq (74 ta) va Angren (92 ta) shaharlarida boshqaruv-servis kompaniyasini aniqlab, ko‘p qavatli uy-joylarga xizmat ko‘rsatishni ularga bersin. Ushbu hududlarda 1,2 mingta ko‘p qavatli uy-joyda 50 mingta xonadon mavjud.

Sherzod Hidoyatov, Jahongir Ortiqxo‘jayev, Davron Hidoyatov 1-avgustga qadar boshqaruv-servis kompaniyalari bilan ishlash bo‘yicha Yunusobod tumani va Chirchiq shahrida namunaviy tajriba yaratib, tanlab olingan shahar va tuman hokimlarining qurilish va kommunal xizmat bo‘yicha o‘rinbosarlarini yangi tizimda ishlashga o‘qitsin”, – dedi Shavkat Mirziyoyev.

Bundan avval Shavkat Mirziyoyev “Obod qishloq” va “Obod mahalla” dasturlari ijrosini tanqid qilgani, Shavkat Mirziyoyev “Shaffof qurilish” tizimi orqali bir oyda qancha mablag‘ iqtisod qilinganini aytgani hamda Shavkat Mirziyoyev ko‘p kvartirali uylarni boshqarish tizimini takomillashtirishga oid taqdimot bilan tanishgani haqida xabar berilgandi.