Liverpul politsiyasi mog‘or bosgan bir bo‘lak pishloq surati yordamida giyohvand moddalar bilan savdo qiluvchi shaxsni ushladi

Buyuk Britaniya politsiyasi bir bo‘lak pishloq yordamida giyohvand moddalar bilan savdo qiluvchi shaxsni qo‘lga oldi, deb xabar beradi Esquire.

Ma’lum qilinishicha, liverpullik 39 yoshli Karl Styuart EncroChat shifrlangan aloqa servisidan foydalangan holda geroin, kokain va boshqa taqiqlangan vositalar savdosi bilan shug‘ullanib kelgan.

Politsiya Yevropolning Venetic keng ko‘lamli operatsiyasi doirasida jinoyatchilar foydalangan messenjerni buzib kirishga muvaffaq bo‘lgan. Natijada huquq-tartibot xodimlari Styuratning yozishmalarini ochgan. Karlning shaxsiga u suhbatdoshiga yuborgan havorang mog‘or bosgan pishloq surati yordamida aniqlik kiritilgan.

Suratda giyohvand moddalar bilan savdo qiluvchi shaxsning faqat qo‘llari ko‘rilgan, biroq bu barmoq izini tahlil qilish uchun yetarli bo‘lib chiqqan.

Jinoyatchi 13 yilga ozodlikka mahrum etilgan. U sodir etgan jinoyatlari bo‘yicha aybiga iqror bo‘lgan.

Venetic operatsiyasi natijasida EncroChat’ning 60 mingga yaqin foydalanuvchisi aniqlangan, ularning 10 ming nafari — Buyuk Britaniyada. Ularning barchasi giyohvand moddalar va qurollarni yetkazib berish hamda tarqatishda, pul yuvishda va boshqa jinoyatlarda ayblanmoqda.