Koronavirusga qarshi vaksinatsiya boshlangach, dunyoda 9 nafar yangi milliarder paydo bo‘ldi

Koronavirus pandemiyasi davrida farmatsevtika kompaniyalarining COVID-19’ga qarshi vaksinalar ishlab chiqarishidan olingan foydaning o‘sishi hisobiga eng kamida 9 kishi milliarderga aylandi. Bu haqda People’s Vaccine Alliance ma’lumotlariga tayanib Oxfam xayriya tashkiloti xabar berdi.

To‘qqiz nafar milliarderning umumiy boyligi 19,3 milliard dollarni tashkil qiladi.

Vaksina ishlab chiqarish orqali boylik orttirgan milliarderlar:

1. Amerikaning Moderna kompaniyasi bosh direktori Stefan Bansel — 4,3 milliard dollar;
2. Germaniyaning BioNTech kompaniyasi asoschilaridan biri va rahbari Ugur Shaxin — 4 milliard dollar;
3. Moderna kompaniyasining investori va immunologi Timoti Springer — 2,2 milliard dollar;
4. Moderna kompaniyasining direktorlar kengashi raisi Nubar Afeyan — 1,9 milliard dollar;
5. Moderna vaksinalari uchun qadoqlar ishlab chiqaruvchi ROVI kompaniyasi rahbari Xuan Lopes-Belmonte — 1,8 milliard dollar;
6. Moderna kompaniyasining investori va olimi Robert Langer — 1,6 milliard dollar;
7. Xitoyning CanSino Biologics farmkompaniyasi ta’sischilaridan biri va bosh ilmiy xodimi Chju Tao — 1,3 milliard dollar;
8. Xitoyning CanSino Biologics farmkompaniyasi ta’sischilaridan biri va bosh vitse-prezidenti Syu Dunsu — 1,2 milliard dollar;
9. Xitoyning CanSino Biologics farmkompaniyasi ta’sischilaridan biri va bosh vitse-prezidenti Mao Xuayxua — 1 milliard dollar.

Avvalroq Jahon sog‘liqni saqlash tashkiloti rahbari Tedros Gebreyesus dunyoda koronavirus vaksinalarining teng taqsimlanmayotganini ta’kidlagan edi. Uning ma’lum qilishicha, dunyodagi 832 million vaksinaning 82 foizi yuqori yoki o‘rta daromadli mamlakatlarda ishlatilgan.

2020-yilning dekabr oyida Forbes jurnali pandemiya sharoitida milliarderga aylangan sog‘liqni saqlash xodimlarining 50 kishilik ro‘yxatini tuzgan edi. O‘shanda Ugur Shaxin (4,2 milliard dollar), Stefan Bansel (4,1 milliard dollar) va Xitoyning yetakchi vaksina ishlab chiqaruvchilaridan biri bo‘lgan Shenzhen Kangtai Biological Product kompaniyasining 24 foiz ulushiga egalik qiluvchi Yuan Lipin (4,1 milliard dollar) ro‘yxatda yetakchilik qilgan.