Italiyadagi Mottarone tog‘i hududida arqon yo‘li kabinasi qulab tushdi, to‘qqiz kishi halok bo‘ldi, deb yozadi “RBK”.
Keyinroq Quotidiano Nazionale qurbonlar soni 12 kishiga yetganini ma’lum qildi.
Mahalliy Rainews24 telekanali xabariga qaraganda, yo‘nalish oxiriga yetay deb qolganida ko‘tarma yo‘l arqoni uzilib ketgan. Kabina borish qiyin bo‘lgan o‘rmonli joyga qulab tushgan, bu qutqaruv operatsiyasini murakkablashtirgan. Qutqaruvchilar kabinani yerda deyarli butunlay pachoqlanib, ostin-ustun bo‘lgan holda topgan.
Kabina ichida nechta odam bo‘lgani hozircha noma’lum. Rainews24 xabariga ko‘ra, arqon yo‘li kabinasining sig‘imi 40 yo‘lovchiga teng.
Mottarone arqon yo‘li qariyb 1,5 ming metr balandlikdan o‘tgan bo‘lib, Lago Majore ko‘li yaqinida joylashgan Streza aholi punktini Monterone tog‘i bilan bog‘laydi. Arqon yo‘li bo‘ylab sayr 20 daqiqa davom etadi.
Yo‘l 1970-yilda ochilgan. So‘nggi marta u 2014—2016-yillarda to‘liq ta’mirdan chiqarilgan.
Izoh (0)