Коронавирус пандемияси даврида фармацевтика компанияларининг COVID-19’га қарши вакциналар ишлаб чиқаришидан олинган фойданинг ўсиши ҳисобига энг камида 9 киши миллиардерга айланди. Бу ҳақда People’s Vaccine Alliance маълумотларига таяниб Oxfam хайрия ташкилоти хабар берди.
Тўққиз нафар миллиардернинг умумий бойлиги 19,3 миллиард долларни ташкил қилади.
Вакцина ишлаб чиқариш орқали бойлик орттирган миллиардерлар:
- Американинг Moderna компанияси бош директори Стефан Бансел — 4,3 миллиард доллар;
- Германиянинг BioNTech компанияси асосчиларидан бири ва раҳбари Угур Шахин — 4 миллиард доллар;
- Moderna компаниясининг инвестори ва иммунологи Тимоти Спрингер — 2,2 миллиард доллар;
- Moderna компаниясининг директорлар кенгаши раиси Нубар Афеян — 1,9 миллиард доллар;
- Moderna вакциналари учун қадоқлар ишлаб чиқарувчи РОВИ компанияси раҳбари Хуан Лопес-Белмонте — 1,8 миллиард доллар;
- Moderna компаниясининг инвестори ва олими Роберт Лангер — 1,6 миллиард доллар;
- Хитойнинг CanSino Biologics фармкомпанияси таъсисчиларидан бири ва бош илмий ходими Чжу Тао — 1,3 миллиард доллар;
- Хитойнинг CanSino Biologics фармкомпанияси таъсисчиларидан бири ва бош вице-президенти Сю Дунсу — 1,2 миллиард доллар;
- Хитойнинг CanSino Biologics фармкомпанияси таъсисчиларидан бири ва бош вице-президенти Мао Хуайхуа — 1 миллиард доллар.
Аввалроқ Жаҳон соғлиқни сақлаш ташкилоти раҳбари Тедрос Гебрейесус дунёда коронавирус вакциналарининг тенг тақсимланмаётганини таъкидлаган эди. Унинг маълум қилишича, дунёдаги 832 миллион вакцинанинг 82 фоизи юқори ёки ўрта даромадли мамлакатларда ишлатилган.
2020 йилнинг декабрь ойида Forbes журнали пандемия шароитида миллиардерга айланган соғлиқни сақлаш ходимларининг 50 кишилик рўйхатини тузган эди. Ўшанда Угур Шахин (4,2 миллиард доллар), Стефан Бансел (4,1 миллиард доллар) ва Хитойнинг етакчи вакцина ишлаб чиқарувчиларидан бири бўлган Shenzhen Kangtai Biological Product компаниясининг 24 фоиз улушига эгалик қилувчи Юань Липин (4,1 миллиард доллар) рўйхатда етакчилик қилган.
Изоҳ (0)