Италиядаги дор йўли узилиб, юк кўтаргич кабина қулаб тушиши оқибатида жабрланган бола касалхонада вафот этди. Шу тариқа, ҳалокат қурбонлари сони 14 кишига етди, деб ёзади «РБК».
ANCA маълумотларига қараганда, 13 киши, шу жумладан, икки ёшли бола воқеа жойида ҳалок бўлган. Тўққиз ва беш ёшдаги икки нафар бола оғир аҳволда шифохонага олиб кетилган. Кейинроқ уларнинг каттаси вафот этган.
Кабина қулаши оқибатида жабрланган тўққиз ёшли бола касалхонада вафот этгани ҳақида Corriere della sera нашри ҳам хабар берди. Беш ёшли боланинг аҳволи оғир деб баҳоланмоқда.
Авария 23 май куни юз берди. Дор йўли узилиб кетиши оқибатида тахминан 20 метр баландликдан ичида 15 киши бўлган кабина қулаб тушди. Дастлаб 12 киши ҳалок бўлгани хабар берилган эди.
Маҳаллий Rainews24 телеканали хабарига қараганда, йўналиш охирига етай деб қолганида кўтарма йўл дори узилиб кетган. Кабина бориш қийин бўлган ўрмонли жойга қулаб тушган, бу қутқарув операциясини мураккаблаштирган. Қутқарувчилар кабинани ерда деярли бутунлай пачоқланиб, остин-устун бўлган ҳолда топган.
Дор йўли кабинасининг сиғими 40 йўловчига тенг.
Дор йўли қарийб 1,5 минг метр баландликдан ўтган бўлиб, Лаго Мажоре кўли яқинида жойлашган Стреза аҳоли пунктини Монтероне тоғи билан боғлайди. Дор йўли бўйлаб сайр 20 дақиқа давом этади.
Йўл 1970 йилда очилган. Сўнгги марта у 2014—2016 йилларда тўлиқ таъмирдан чиқарилган.
Изоҳ (0)