Davlat soliq qo‘mitasi raisi Sherzod Kudbiyev 24-may, dushanba kuni “Toshkent 5 tashabbus harakati” festivali doirasidagi yoshlar bilan uchrashuvda jurnalistlar tomonidan berilgan savollarga emas, yigit-qizlar bilan muloqot qilish taklifini kiritdi va jurnalistdan xayp qilmaslikni so‘radi. Bu haqda “Daryo” muxbiri xabar bermoqda.
Jurnalistga ko‘ra, bosh vazir o‘rinbosari Sardor Umurzoqov tadbirkorlar bilan uchrashuvda bir necha milliard so‘mlik QQS yana ularga qaytarib berilishini buni Davlat soliq qo‘mitasiga yuklanganini aytgan. Bosh prokuratura buni nazoratga olganini ta’kidlagan. Ammo DSQ buni tan olmasdan rad qilgan. Aynan shu masala yuzasidan jurnalist qo‘mita rahbaridan nega bu rad etilgani va qachon QQS tadbirkorlarga qaytarilishi haqida savol bilan murojaat qildi. Kudbiyev savolga quyidagicha javob qaytardi:
“Yana ko‘pchilikni bu masala qiziqtirayotgan bo‘lsa kerak-a? Biz o‘zi yoshlar bilan uchrashuv qilyapmizmi yoki QQS masalasini muhokama qilamizmi? Vaqtimiz cheklangan, shuning uchun yoshlarga imkoniyat berishni iltimos qilgan bo‘lardim. Bu savoldan yoki bu masaladan qochishdan emas. Bir marta javob beraman. Ruxsat bersanglar, etika nuqtayi nazaridan ko‘proq yoshlarga imkon bersak, yoshlar bilan gaplashsak. Keyin 10 daqiqacha vaqt ajratib, QQS bo‘yicha ishlar haqida gapirib berishim mumkin.
(Jurnalistga qarata) Singlim, sizga bir savol, o‘sha topshiriqni o‘qiganmisiz? Bu birinchi savol. Ikkinchi savol, u yerda (QQSni) qaytarib bersin degan topshiriq bormi? Agar topshiriqni o‘qigan bo‘lsangiz, u yerda QQS qaytarib berilsin degan gap yo‘q. Sud masalasi haqida shoshmay turing. Topshiriq haqida so‘rayapsiz. Siz o‘zingiz o‘sha protokolni o‘qiganmisiz, deb qarshi savol beryapman. Protokolni o‘qimasdan turib, shuncha yoshning vaqtini olib, xayp uchun bu savolni menga berishingiz etikaga qanchalik to‘g‘ri keladi?
U yerda bunday topshiriq yo‘q. U yerda, adashmasam, 587 yoki 589 tami o‘rinda kontragentlar to‘g‘risida savol bo‘lgan va shuni qaytarib berish yuzasidan choralar ko‘rib chiqilsin, degan jumlalar yozilgan. Ya’ni biz hukumat topshirig‘ini so‘zsiz bajaramiz, Soliq qo‘mitasi bu topshiriqni bajargan va biz qaytarib berish choralarini ko‘rganmiz. Hozir raqamlarda adashishim mumkin, taxminan, 150 ga yaqin kontragentga QQS pulini qaytarib berganmiz. Yana bir qismini, tan olganlarini bo‘lib-bo‘lib to‘lashga ruxsat berganmiz. Taxminan, 30 foiziga pulni qaytarib berishni mutlaqo rad etganmiz va bu bo‘yicha hukumatga axborot kiritganmiz”, — dedi Kudbiyev.
Izoh (0)