Давлат солиқ қўмитаси раиси Шерзод Кудбиев 24 май, душанба куни «Тошкент 5 ташаббус ҳаракати» фестивали доирасидаги ёшлар билан учрашувда журналистлар томонидан берилган саволларга эмас, йигит-қизлар билан мулоқот қилиш таклифини киритди ва журналистдан хайп қилмасликни сўради. Бу ҳақда «Дарё» мухбири хабар бермоқда.
Журналистга кўра, бош вазир ўринбосари Сардор Умурзоқов тадбиркорлар билан учрашувда бир неча миллиард сўмлик ҚҚС яна уларга қайтариб берилишини буни Давлат солиқ қўмитасига юкланганини айтган. Бош прокуратура буни назоратга олганини таъкидлаган. Аммо ДСҚ буни тан олмасдан рад қилган. Айнан шу масала юзасидан журналист қўмита раҳбаридан нега бу рад этилгани ва қачон ҚҚС тадбиркорларга қайтарилиши ҳақида савол билан мурожаат қилди. Кудбиев саволга қуйидагича жавоб қайтарди:
«Яна кўпчиликни бу масала қизиқтираётган бўлса керак-а? Биз ўзи ёшлар билан учрашув қиляпмизми ёки ҚҚС масаласини муҳокама қиламизми? Вақтимиз чекланган, шунинг учун ёшларга имконият беришни илтимос қилган бўлардим. Бу саволдан ёки бу масаладан қочишдан эмас. Бир марта жавоб бераман. Рухсат берсанглар, этика нуқтаи назаридан кўпроқ ёшларга имкон берсак, ёшлар билан гаплашсак. Кейин 10 дақиқача вақт ажратиб, ҚҚС бўйича ишлар ҳақида гапириб беришим мумкин.
(Журналистга қарата) Синглим, сизга бир савол, ўша топшириқни ўқиганмисиз? Бу биринчи савол. Иккинчи савол, у ерда (ҚҚСни) қайтариб берсин деган топшириқ борми? Агар топшириқни ўқиган бўлсангиз, у ерда ҚҚС қайтариб берилсин деган гап йўқ. Суд масаласи ҳақида шошмай туринг. Топшириқ ҳақида сўраяпсиз. Сиз ўзингиз ўша протоколни ўқиганмисиз, деб қарши савол беряпман. Протоколни ўқимасдан туриб, шунча ёшнинг вақтини олиб, хайп учун бу саволни менга беришингиз этикага қанчалик тўғри келади?
У ерда бундай топшириқ йўқ. У ерда, адашмасам, 587 ёки 589 тами ўринда контрагентлар тўғрисида савол бўлган ва шуни қайтариб бериш юзасидан чоралар кўриб чиқилсин, деган жумлалар ёзилган. Яъни биз ҳукумат топшириғини сўзсиз бажарамиз, Солиқ қўмитаси бу топшириқни бажарган ва биз қайтариб бериш чораларини кўрганмиз. Ҳозир рақамларда адашишим мумкин, тахминан, 150 га яқин контрагентга ҚҚС пулини қайтариб берганмиз. Яна бир қисмини, тан олганларини бўлиб-бўлиб тўлашга рухсат берганмиз. Тахминан, 30 фоизига пулни қайтариб беришни мутлақо рад этганмиз ва бу бўйича ҳукуматга ахборот киритганмиз», — деди Кудбиев.
Изоҳ (0)