Surxondaryoda 2020-yilda onalar va bolalar o‘limi soni oshdi. Bu haqda 20-may kuni Oliy Majlis Senatining prokuratura organlari faoliyati ustidan nazorat qiluvchi komissiyasi majlisida ma’lum qilindi.
Dastlab “Fuqarolar sog‘lig‘ini saqlash to‘g‘risida”gi qonun ijrosi, shu jumladan, bolalarda kasalliklarni erta aniqlash va profilaktika qilish, bolalar tibbiy ko‘rigini va davolash-sog‘lomlashtirish tadbirlarini o‘z vaqtida amalga oshirish, onalik va bolalikni muhofaza qilish borasidagi prokuror nazorati holatini Surxondaryo viloyatida o‘rganish natijalari muhokama qilingan.
Majlisda ishtirok etgan “Rost24”ning yozishicha, ma’lumotlarga ko‘ra, Surxondaryo viloyatida yashovchi qariyb 2,7 million nafar aholining 900 ming nafarga yaqini yoki 33,2 foizini voyaga yetmaganlar, 600 ming nafardan ortig‘ini tug‘ish yoshidagi ayollar tashkil etadi. 2020-yil davomida jami 35 ta (2019-yil 16 ta) onalar o‘limi qayd etilgan bo‘lib, 2019-yilning shu davriga nisbatan 19 taga ko‘paygan. Shuningdek, bolalar o‘limi darajasi 2020-yil davomida 586 tani tashkil qilgan bo‘lsa, bu ko‘rsatkich oldingi yillarga nisbatan kamaymagan.
Onalar o‘limi Angor tumanida nisbatan yuqori bo‘lib, 6 nafar, Termiz shahar va Jarqo‘rg‘on tumanida 4 nafardan va bolalar o‘limi darajasi Uzun tumanida 6 (13), Termiz shahrida 49 (160) nafarni tashkil etib, 2019-yilga nisbatan Uzun tumanida 2 baravar, Termiz shahrida 3 baravar oshganligi aniqlangan.
Bolalar o‘limi kasalliklar bo‘yicha tahlili, 259 nafari perinatal davri kasalliklaridan, 183 nafari nafas olish organi kasalliklaridan vafot etgan bolalar soni nisbatan yuqori darajada ekani tanqid qilindi. Shuningdek, viloyat tibbiyot muassasalardagi vrachlarga ajratilgan shtat (7 602.5) birligidan hozirda 3 612 ta (47,5 foiz) shtat birligi vakant ekanligi ta’kidlandi. Bundan tashqari, to‘liq tibbiy jihozlar bilan ta’minlanmagani, jumladan, 99 ta oilaviy poliklinikaning birortasida UZI apparati yo‘qligi aytildi.
Majlisda uchrayotgan tizimli xato va kamchiliklarni bartaraf etish maqsadida komissiya a’zolari tomonidan tavsiyalar berilib, tegishli qarorlar qabul qilindi.
Eslatib o‘tamiz, 24-aprelda Senatning Sud-huquq masalalari va korrupsiyaga qarshi kurashish qo‘mitasi raisi Narimon Umarov O‘zbekistonda o‘tgan yilga nisbatan go‘daklar va onalar o‘limi oshganini aytgandi. Qo‘mita raisi O‘zbekistonda reproduktiv salomatlikni, onalik va bolalikni muhofaza qilishga oid qonun hujjatlari ijrosini ta’minlashdagi kamchiliklar oqibatida 2019-yilga nisbatan go‘daklar o‘limi 428 taga (2019-yilda 6432 ta, 2020-yilda esa 6860 ta), onalar o‘limi 10 taga (145-155) oshganini ma’lum qilgandi.
Izoh (0)