Tuzatildi: “Xabar.uz” nashri Qurbonmurod Taparovning Davlat aktivlarini boshqarish agentligi direktori birinchi o‘rinbosari etib tayinlangani haqida xabar bergan edi. Biroq agentlik matbuot xizmati bu xabarni rad etdi. Taparov faoliyatini qayerda davom etttirishi hozircha rasman noma’lum.
Qurbonmurod Taparov 1978-yilda Qashqadaryo viloyati G‘uzor tumanida tug‘ilgan. Ma’lumoti oliy — 1999-yilda Qarshi davlat universitetini, 2004-yilda Bank-moliya akademiyasi va 2012-yilda Ritsumeykan universiteti (Yaponiya)ni tamomlagan. Mehnat faoliyatini 1999-yilda Qashqadaryo viloyati moliya boshqarmasining 1-toifali iqtisodchisi lavozimida boshlagan.
2003-yilda Moliya vazirligi huzuridagi Davlat ehtiyojlari uchun xarid qilinadigan qishloq xo‘jaligi mahsulotlari hisob-kitobi jamg‘armasining Qashqadaryo viloyatidagi mintaqaviy yetakchi inspektori sifatida, keyinchalik ushbu boshqarmaning Qoraqalpog‘iston budjeti va mahalliy budjetlarning tuzilishi va ijro etilishi ustidan nazorat olib borish bo‘limi bosh iqtisodchisi, bo‘limi boshlig‘i o‘rinbosari va bo‘lim boshlig‘i lavozimlarida ishlagan.
2017—2018-yillarda Moliya vazirligi Hududlar moliyasi bosh boshqarmasi boshlig‘i o‘rinbosari va keyinchalik boshqarma boshlig‘i, 2018-yildan boshlab Prezident administratsiyasi mahalliy davlat hokimiyati organlari bilan ishlash sho‘basi yetakchi inspektori lavozimida ishlab kelgan. U 2020-yil sentabrida moliya vaziri o‘rinbosari etib tayinlangan edi.
Avvalroq Farg‘ona viloyati hokimiga yangi o‘rinbosar tayinlangani, Miralisher Islomov Gematologiya markaziga direktor etib tayinlangani hamda Avtomobil yo‘llari qo‘mitasi raisiga o‘rinbosarlar tayinlangani haqida xabarlar berilgan edi.
Izoh (0)