Andijonda kuchli shamol oqibatida elektr tarmog‘ida yuzaga kelgan avariyaviy holatlar va nosozliklar bartaraf etildi

19-may kuni yuz bergan kuchli shamol ta’sirida Andijon viloyatining shahar va tumanlarida elektr tarmog‘i xo‘jaligi obyektlarida avariyaviy holatlar va nosozliklar yuzaga keldi. “O‘zenergoinspeksiya” matbuot xizmatining “Daryo”ga ma’lum qilishicha, buning oqibatda iste’molchilarga elektr energiya yetkazishda uzilishlar kuzatilgan.

Xususan, Xo‘jaobod tuman elektr ta’minoti korxonasi tasarrufidagi 10 kV kuchlanishli “Mustahkam” havo elektr uzatish liniyasining “Ko‘prikboshi” mahallasi hududidan o‘tgan qismida, ko‘p yillik terak daraxtlarining kuchli shamol ta’sirida yiqilishi natijasida temir-beton tayanchlar sinib, elektr uzatuvchi simlar uzilgan. Buning oqibatida mavjud elektr tarmog‘iga zarar yetib, tumanning “Ko‘prikboshi”, “Qorabuloq” va “Uchko‘cha” MFY hududlarida joylashgan iste’molchilarning elektr ta’minotida jiddiy uzilish yuzaga kelgan.

Sodir bo‘lgan avariya va nosozliklarni bartaraf qilish bo‘yicha “Andijon XETK” AJning shahar va tuman elektr ta’minoti korxonalarida tezkor ta’mir guruhlari tashkil qilindi. “O‘zenergoinspeksiya” avariya va nosozliklarni bartaraf qilish jarayonida xavfsizlik chora-tadbirlarining bajarilishini to‘liq nazoratga olgan.

Holat bo‘yicha inspeksiya hududiy bo‘limi Xo‘jaobod TETKning mas’ul xodimlari bilan birgalikda joyida o‘rganilib, yuzaga kelgan avariyani bartaraf qilish va elektr tarmog‘ini tiklash chora-tadbirlari tuzilgan.

Ta’mirlash ishlariga mutaxassislar va “Andijon XETK” AJning bo‘limlari tomonidan maxsus texnikalar jalb qilinib, nosozliklar shu kunning o‘zida bartaraf qilingan.

Avvalroq 20-may kuni Toshkentda kuzatilgan kuchli shamol oqibatida Malibu ustiga daraxt qulagani, yerusti metro bekatlaridan birining tom qismiga zarar yetkazgani haqida xabar berilgan edi. Shamol oqibatida poytaxtning Sergeli va Zangiota tumanlariga tegishli “O‘zgarish” hududida elektr tarmog‘ida uzilish yuzaga kelgan, shuningdek, Toshkent viloyatining Olmaliq shahridagi ayrim mahallalar, Angren shahrining katta qismi elektr ta’minotisiz qolgan. Ohangaron shahrida shamol ta’sirida hatto ichimlik suvi ham o‘chgandi.