“Toshkent besh tashabbus harakati” doirasida yoshlar bilan ochiq muloqotda bosh vazir o‘rinbosari Behzod Musayev oliy ta’lim muassasalariga kirish imtihonlari uchun beshta fandan test sinovlari bo‘lishi haqidagi masalaga to‘xtalib o‘tdi. Bu haqda “Daryo” muxbiri xabar bermoqda.
“Hozircha bu yilgi test sinovlarida nechta fandan imtihon bo‘lishi masalasi to‘liq hal bo‘lgani yo‘q. Bu masalani hal qiladigan respublikaning maxsus komissiyasi bor. Ushbu komissiya a’zosi sifatida sizga aytishim mumkinki, 5ta fandan test bo‘lishi masalasi hech qayerda tasdiqlangani yo‘q. Ko‘rdingiz, pandemiya sabab o‘tgan yili 2ta fandan imtihonlar o‘tkazildi. Karantin to‘liq chekinmagan holatda ikkita fandan topshirib, keyingi yilda birdaniga beshta fandan bo‘lishi ham unchalik to‘g‘ri bo‘lmaydi. Bu masala ko‘rib chiqilmoqda va tez orada aniq bir to‘xtamga kelinadi”, — dedi Musayev.
Avvalroq O‘zbekistonda 2021-yilda ham oliy ta’lim muassasalariga kirish imtihonlari stadionlarda o‘tkazilishi mumkinligi, ayni paytda DTM tomonidan testlarni o‘tkazish bo‘yicha ikki xil ssenariy ustida ish olib borayotgani: an’anaviy shaklda katta sig‘imli binolarda o‘tkazish; pandemiya sharoitidagi kabi ochiq maydonlarda o‘tkazish variantlari borligi aytilgan. Bundan tashqari, O‘zbekistonda oliygohlarga kirish uchun topshiriladigan test sinovi fanlar majmuasi tasdiqlangan edi.
Eslatib o‘tamiz, 2020-yilda OTMga kirish uchun o‘tkaziladigan imtihonlar 2-sentabrdan boshlanib, stadionlarda bo‘lib o‘tgan edi.
Mavzuga doir:
- Ochiq osmon ostida o‘tayotgan O‘zbekiston OTMlariga kirish imtihonlari aks etgan surat The New York Times muqovasidan o‘rin oldi
- Yangi O‘zbekiston universiteti tashkil qilinadi — bosh vazir o‘rinbosari
- “Jurnalist va blogerlar, to‘yimizni buzmanglar, to‘y to‘ydek bo‘lsin!” — Jahongir Ortiqxo‘jayev yoshlar festivali haqida
- “Toshkent 5 tashabbus harakati” yoshlar festivali uchun qancha mablag‘ ajratilgani ma’lum qilindi
Izoh (0)