Hindistonning Telangan shtatidagi Nalgonda tumanida Ramavat Shiva Naik ismli 18 yoshli talaba o‘zida koronavirus aniqlanganini bilgach, 11 kun davomida daraxtda yashadi, deb xabar beradi Esquire.
Shiva ota-onasi va singlisi bilan birga Kotanandikonda qishlog‘ida yashaydi. U 4-may kuni o‘zida koronavirus aniqlangani sabab izolyatsiyalanishi kerak bo‘lgan. Biroq Shivaning uyida alohida xona yo‘q, shu sababli yigit uyi orqasidagi daraxtlardan birida yashashga qaror qilgan.
Shiva daraxtga bambuk va arqondan karavot yasagan. Mahalliy nashrlarning jurnalistlari talaba bilan bog‘lanmaguniga qadar u 15-maygacha daraxtda o‘tirgan. Bu vaqt davomida u mobil telefon orqali oilasi va do‘stlari bilan aloqada bo‘lib turgan. Shivaning ota-onasi har kuni unga kerakli narsalarni olib kelgan, yigit esa ularni arqon va paqir yordamida ko‘tarib olgan.
Jurnalistlar tashrifi qishloqning boshqa aholisi hamda politsiya e’tiborini tortgan. Shiva 13-may kuni koronavirusga chalinganlarni yakkalash uchun ixtisoslashtirilgan mahalliy xostellardan biriga yuborilgan.
Ushbu izolyator paydo bo‘lguniga qadar koronavirusga chalingan aholi 5 kilometr uzoqlikdagi emlash punktiga borishi kerak bo‘lgan. Biroq u yerda bo‘sh o‘rinlar yo‘qligi sabab hammaga ham yordam ko‘rsatilmagan. Shu sababli aholining aksariyati hammomlarda, vaqtinchalik kulbalar va hatto dalada o‘zini o‘zi yakkalagan.
Hindistonda 21-apreldan boshlab har kuni 300 mingdan ortiq odam koronavirusga chalinmoqda. Jons Hopkins universiteti ma’lumotlariga ko‘ra, pandemiya boshlanganidan buyon mamlakatda 25,3 million kishi koronavirusga chalingan, 278 mingdan ortiq odam vafot etgan.
Avvalroq polshalik haydovchi koronavirus sabab uch kun mashinasining ichida yashagani to‘g‘risida xabar berilgandi.
Izoh (0)