Ҳиндистоннинг Теланган штатидаги Налгонда туманида Рамават Шива Наик исмли 18 ёшли талаба ўзида коронавирус аниқланганини билгач, 11 кун давомида дарахтда яшади, деб хабар беради Esquire.
Шива ота-онаси ва синглиси билан бирга Котанандиконда қишлоғида яшайди. У 4 май куни ўзида коронавирус аниқлангани сабаб изоляцияланиши керак бўлган. Бироқ Шиванинг уйида алоҳида хона йўқ, шу сабабли йигит уйи орқасидаги дарахтлардан бирида яшашга қарор қилган.
Шива дарахтга бамбук ва арқондан каравот ясаган. Маҳаллий нашрларнинг журналистлари талаба билан боғланмагунига қадар у 15 майгача дарахтда ўтирган. Бу вақт давомида у мобил телефон орқали оиласи ва дўстлари билан алоқада бўлиб турган. Шиванинг ота-онаси ҳар куни унга керакли нарсаларни олиб келган, йигит эса уларни арқон ва пақир ёрдамида кўтариб олган.
Журналистлар ташрифи қишлоқнинг бошқа аҳолиси ҳамда полиция эътиборини тортган. Шива 13 май куни коронавирусга чалинганларни яккалаш учун ихтисослаштирилган маҳаллий хостеллардан бирига юборилган.
Ушбу изолятор пайдо бўлгунига қадар коронавирусга чалинган аҳоли 5 километр узоқликдаги эмлаш пунктига бориши керак бўлган. Бироқ у ерда бўш ўринлар йўқлиги сабаб ҳаммага ҳам ёрдам кўрсатилмаган. Шу сабабли аҳолининг аксарияти ҳаммомларда, вақтинчалик кулбалар ва ҳатто далада ўзини ўзи яккалаган.
Ҳиндистонда 21 апрелдан бошлаб ҳар куни 300 мингдан ортиқ одам коронавирусга чалинмоқда. Жонс Ҳопкинс университети маълумотларига кўра, пандемия бошланганидан буён мамлакатда 25,3 миллион киши коронавирусга чалинган, 278 мингдан ортиқ одам вафот этган.
Аввалроқ польшалик ҳайдовчи коронавирус сабаб уч кун машинасининг ичида яшагани тўғрисида хабар берилганди.
Изоҳ (0)