Yaponiyada 93 yoshli erkak geymer sifatida tanildi. Yoshligida haydovchi bo‘lib ishlagan keksa nabirasi sabab virtual poygalarga qiziqib qolgan, deb xabar beradi Esquire.
Nabira koronavirus pandemiyasi vaqtida qariyani o‘yin o‘ynashga o‘rgatgan. Uning so‘zlariga ko‘ra, bobosi hech qachon texnologiyalarga qiziqish bildirmagan, biroq doim mashina boshqarishni yaxshi ko‘rgan. Shu sababli nabirasining o‘yin ruli va Forza 7 poyga o‘yinini ko‘rib qolgach, uni sinab ko‘rishni so‘ragan.
Keksa geymerning o‘ynayotgani tasvirlangan kadrlar YouTube’dagi Olivin Corp kanalida e’lon qilingan. Videoning birinchisi to‘rt oy oldin joylashtirilgan bo‘lib, hozirga qadar 3 million martadan ortiq tomosha qilingan.
1960-yillarda erkak Tokioda taksichi bo‘lib ishlagan, 1970-yillardan boshlab yuk mashina haydashni boshlagan. Haydovchilik guvohnomasini bundan yetti yil oldin, yoshi o‘tib qolgani sabab topshirib yuborgan.
Kompyuter o‘yinlari sabab erkak yana o‘zining sevimli avtomobili “ruliga o‘tirgan”. U o‘zining birinchi avlod Mazda RX-7 modelini yaxshi xotiralari bilan eslaydi. O‘yinlar ham u aynan o‘zining mashinasi rangini tanlab keladi. Keksa geymer xuddi professionallar kabi mexanik uzatmalar qutisi va murakkab darajadagi yo‘llarda harakatlanish bosqichlarini tanlaydi.
Eslatib o‘tamiz, 2020-yilda 90 yoshli yaponiyalik ayol dunyodagi eng keksa geymer sifatida Ginnes rekordlar kitobiga kiritilgandi.
Mavzuga doir: Ukrainada 90 yoshli ayol samolyot boshqardi (video)
Izoh (0)