Toshkent viloyatining Chinoz tumanidagi 45-maktab direktori Zubayda Toshpo‘latovaning ovozi deb taxmin qilinayotgan audio 17-may kuni ijtimoiy tarmoqlarda tarqalgandi. Unda ayol o‘quvchi qizlarni maktabga ro‘molda kelmasliklarini talab qilgan. Buning ortidan Toshkent viloyati Xalq ta’limi boshqarmasi holat bo‘yicha ichki tekshiruv boshlanganini ma’lum qilgandi.
“Ro‘mollilarning safi maktabda ko‘payib ketishini xohlamayman. Maktabning imijini buzadi. Hozir indashmayotganining sababi — saylov o‘tishini kutishyapti. Saylov o‘tib olsin, ko‘rasizlar. Qanaqadir tashkilotlar kelib surishtirishi kerakmi ota-onalaringni?” — deyilgan audiodagi ovozda.
Audioda haqiqatan ham 45-maktab direktori Zubayda Toshpo‘latova ekanligi ma’lum bo‘ldi. U videomurojaat qilib, qilgan xatosini tushunib yetganini aytib, uzr so‘radi.
“Haqiqatan kecha maktabga o‘quvchi qizlar maktab formasisiz kelgani uchun o‘z xizmat xonamga olib kirib, ochiq rangli ro‘molni orqa tarafdan o‘rash haqida xizmat vakolatim doirasida tushuntirish ishlarini olib bordim. Ro‘mol o‘ramaslik haqida mahalliy hokimlik va huquq-targ‘ibot organlari hamda Xalq ta’limi bo‘limi tomonidan hech qanday topshiriq bo‘lmadi. Faqat o‘quvchi qizlarimga o‘quvchi qizdek munosabat bo‘lishini xohlaganim uchun ularga tushuntirish ishlarini olib borgan edim.
Ro‘mol bilan saylov jarayonlarining hech qanday aloqasi yo‘q. Faqatgina saylov jarayonlari vaqtida xalqaro kuzatuvchilarning tashrifi doirasida dunyoviy maktabga bo‘lgan ularning fikri o‘zgarmasligini xohlaganim uchun ularga tushuntirish ishlarini olib borgan edim.
Noto‘g‘ri tushunchaga ega bo‘lganimni tushunib yetdim. Alhamdilulloh, men ham musulmon farzandiman. Qilgan noto‘g‘ri munosabatim uchun jamoatchilik va ota-onalardan uzr so‘rayman”, — degan direktor.
Eslatib o‘tamiz, bundan avval aprel oyining o‘rtalarida hijobdagi o‘quvchi qizlarning huquq-tartibot idorasi xodimi qarshisida turgani aks etgan surat tarqalgandi. Namangan IIB matbuot xizmati bunga munosabat bildirib, o‘quvchi qizlarga maktabga belgilangan tartibda kiyinib kelishlari, hijobda emas ro‘mol o‘rashlari mumkinligi, bunga hech kim qarshilik ko‘rsatmasligi tushuntirilganini ma’lum qilgandi.
Oliy va o‘rta ta’lim vaziri Inomjon Majidov oliy ta’lim muassasalarida hijobga ruxsat beriladimi, degan savolga “Hamma oliy o‘quv yurtlarida ichki tartib-qoidalar mavjud. Ularga amal qilish kerak. Bu faqat bizda emas, butun dunyoda shunday”, deb javob bergandi.
Izoh (0)