Тошкент вилоятининг Чиноз туманидаги 45-мактаб директори Зубайда Тошпўлатованинг овози деб тахмин қилинаётган аудио 17 май куни ижтимоий тармоқларда тарқалганди. Унда аёл ўқувчи қизларни мактабга рўмолда келмасликларини талаб қилган. Бунинг ортидан Тошкент вилояти Халқ таълими бошқармаси ҳолат бўйича ички текширув бошланганини маълум қилганди.
«Рўмоллиларнинг сафи мактабда кўпайиб кетишини хоҳламайман. Мактабнинг имижини бузади. Ҳозир индашмаётганининг сабаби — сайлов ўтишини кутишяпти. Сайлов ўтиб олсин, кўрасизлар. Қанақадир ташкилотлар келиб суриштириши керакми ота-оналарингни?» — дейилган аудиодаги овозда.
Aудиода ҳақиқатан ҳам 45-мактаб директори Зубайда Тошпўлатова эканлиги маълум бўлди. У видеомурожаат қилиб, қилган хатосини тушуниб етганини айтиб, узр сўради.
«Ҳақиқатан кеча мактабга ўқувчи қизлар мактаб формасисиз келгани учун ўз хизмат хонамга олиб кириб, очиқ рангли рўмолни орқа тарафдан ўраш ҳақида хизмат ваколатим доирасида тушунтириш ишларини олиб бордим. Рўмол ўрамаслик ҳақида маҳаллий ҳокимлик ва ҳуқуқ-тарғибот органлари ҳамда Халқ таълими бўлими томонидан ҳеч қандай топшириқ бўлмади. Фақат ўқувчи қизларимга ўқувчи қиздек муносабат бўлишини хоҳлаганим учун уларга тушунтириш ишларини олиб борган эдим.
Рўмол билан сайлов жараёнларининг ҳеч қандай алоқаси йўқ. Фақатгина сайлов жараёнлари вақтида халқаро кузатувчиларнинг ташрифи доирасида дунёвий мактабга бўлган уларнинг фикри ўзгармаслигини хоҳлаганим учун уларга тушунтириш ишларини олиб борган эдим.
Нотўғри тушунчага эга бўлганимни тушуниб етдим. Алҳамдилуллоҳ, мен ҳам мусулмон фарзандиман. Қилган нотўғри муносабатим учун жамоатчилик ва ота-оналардан узр сўрайман», — деган директор.
Эслатиб ўтамиз, бундан аввал апрель ойининг ўрталарида ҳижобдаги ўқувчи қизларнинг ҳуқуқ-тартибот идораси ходими қаршисида тургани акс этган сурат тарқалганди. Наманган ИИБ матбуот хизмати бунга муносабат билдириб, ўқувчи қизларга мактабга белгиланган тартибда кийиниб келишлари, ҳижобда эмас рўмол ўрашлари мумкинлиги, бунга ҳеч ким қаршилик кўрсатмаслиги тушунтирилганини маълум қилганди.
Олий ва ўрта таълим вазири Иномжон Мажидов олий таълим муассасаларида ҳижобга рухсат бериладими, деган саволга «Ҳамма олий ўқув юртларида ички тартиб-қоидалар мавжуд. Уларга амал қилиш керак. Бу фақат бизда эмас, бутун дунёда шундай», деб жавоб берганди.
Изоҳ (0)