Ijtimoiy tarmoqlarda Toshkent shahar hokimi o‘rinbosari Baxtiyor Rahmonovning Toshkent viloyati Oqqo‘rg‘on tumani “Usta Normat” mahalla fuqarolar yig‘ini raisi Alisher Ikromovni turli nojo‘ya so‘zlar bilan haqoratlab, unga nisbatan jismoniy kuch ishlatgani haqida xabarlar tarqaldi. Mahalla va oilani qo‘llab-quvvatlash vazirligi xodimini himoya qilish uchun o‘z vakolati doirasidagi barcha choralarni amalga oshirishini bildirdi.
Vazirlik matbuot xizmatining bildirishicha, voqeaga aniqlik kiritish maqsadida Alisher Ikromov bilan bog‘lanib, holat bo‘yicha dastlabki ma’lumotlarni oldi.
Alisher Ikromov bergan ma’lumotlarga ko‘ra, 9-may kuni u Baxtiyor Rahmonovning ota uyiga chaqirtirilgan. U bu yerda o‘zining xizmat vazifasiga aloqador bo‘lmagan, umuman boshqa bir masalaning bajarilmaganligi bo‘yicha Baxtiyor Rahmonov tomonidan turli nojo‘ya so‘zlar bilan haqoratlangan, hatto unga nisbatan jismoniy kuch ishlatgan.
Ayni vaqtda mazkur holat Mahalla va oilani qo‘llab-quvvatlash vaziri nazoratiga olingan hamda Vazirlik ishchi guruhi tomonidan voqea tafsilotlari batafsil o‘rganilmoqda. Vazirlik ishchi guruh xulosasi asosida Alisher Ikromovning, umuman, mahalla tizimidagi barcha xodimlarning huquqiy manfaatlarini himoya qilish bo‘yicha qonunchilikda belgilangan hamda o‘z vakolati doirasidagi barcha choralarni amalga oshirishini ma’lum qildi.
Eslatib o‘tamiz, Baxtiyor Rahmonov 2021-yil yanvarida Toshkent viloyati hokimligiga o‘tkazilgan Davron Hidoyatov o‘rniga Toshkent shahri hokimining arxitektura, kapital qurilish va kommunikatsiyalarni rivojlantirish masalalari bo‘yicha birinchi o‘rinbosari lavozimiga tayinlangandi. Tayinlovga qadar 2018-yil mayidan Olmazor tumaniga rahbarlik qilib kelgan.
Ma’lumot uchun, 2013-yil 22-aprelda yangi tahrirda qabul qilingan, “Fuqarolarning o‘zini o‘zi boshqarish organlari to‘g‘risida”gi qonunga ko‘ra, fuqarolarning o‘zini o‘zi boshqarish organlari faoliyatiga davlat organlarining va ular mansabdor shaxslarining aralashuviga yo‘l qo‘yilmaydi.
Mahalla va oilani qo‘llab-quvvatlash vazirligi Prezidentning 2020-yil 18-fevraldagi farmoniga asosan, fuqarolar yig‘inlari xodimlarini ularning vazifa va faoliyat yo‘nalishlari bilan bog‘liq bo‘lmagan yig‘ilish va boshqa tadbirlarga jalb qilish, ularning faoliyatiga asossiz aralashish, taalluqli bo‘lmagan vazifalarni yuklash talablarini buzganligi uchun davlat organlari va tashkilotlari mas’ul va mansabdor shaxslarini egallab turgan lavozimidan ozod etishgacha bo‘lgan jazo choralarini qo‘llash bo‘yicha bosh vazirga o‘rnatilgan tartibda taklif kiritib borish huquqiga ega.
Izoh (0)