Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil buzilgan do‘koni uchun kompensatsiya undirolmay kelayotgan tadbirkor to‘g‘risida ma’lumot berdi.
Ma’lum qilinishicha, xususiy korxona rahbari bo‘lgan ushbu tadbirkor Toshkent shahrida umumiy maydoni 72 kvadrat metrlik savdo do‘koni orqali o‘z savdo faoliyatini amalga oshirib kelgan.
Savdo do‘koni joylashgan yer uchastkasi davlat va jamoat ehtiyojlari uchun shahar hokimligi tomonidan olinib, savdo do‘koni buzilgan. Shu bilan birga, tadbirkorga buzilgan savdo do‘konning o‘rniga boshqa binoni ajratish taklif etilgan. Ushbu binoga bo‘lgan huquqni tadbirkor nomiga rasmiylashtirishda hokimning qaror nusxasi lozim bo‘lgan, ammo hokimning qarori maxfiy bo‘lganligi vaj qilinib, uning nusxasi tadbirkorga taqdim etilmagan.
Mazkur holat yuzasidan biznes-ombudsman tomonidan Chilonzor tumanlararo ma’muriy sudiga ariza kiritilgan.
Natijada sud tomonidan kompensatsiya ajratishda Toshkent shahar hokimligining harakatsizligi qonunga xilof deb topilgan va tadbirkorga buzilgan bino-inshoot uchun kompensatsiya ajratish yuzasidan majburiyat yuklatilgan.
Avvalroq Adliya vazirligi “Yer uchastkalarini kompensatsiya evaziga jamoat ehtiyojlari uchun olib qo‘yish tartib-taomillari to‘g‘risida”gi qonun loyihasini muhokamaga qo‘ygandi.
Izoh (0)