Samarqand viloyatining Past Darg‘om tumanida 13 ming dollar evaziga fuqaroga yer olib bermoqchi bo‘lgan soliqchi va fermer xo‘jaligi raisi qo‘lga olindi. Bu haqda viloyat IIB matbuot xizmati xabar berdi.
Ma’lum qilinishicha, 17-may kuni Past Darg‘om tumani davlat soliq inspektori lavozimida ishlovchi B.J. va fermer xo‘jaligi raisi X.B. Pavlovniya ko‘chatini ekish niyatida yurgan fuqaroga Past Darg‘om tumanidan 15 gektar yer maydonini 13 ming dollar evaziga rasmiylashtirib berishni va’da qilgan.
Undan so‘ralgan pullarni firibgarlik yo‘li bilan qo‘lga kiritayotgan vaqtida Samarqand viloyati IIB JQB korrupsiya va iqtisodiy jinoyatlarga qarshi kurashish bo‘limi, DXXning viloyat boshqarmasi hamda viloyat prokuraturasi xodimlari hamkorligida o‘tkazilgan tezkor tadbir davomida qo‘lga olingan.
Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib tergov harakatlari olib borilmoqda.
Avvalroq Samarqand viloyatining Urgut va Bulung‘ur tumanida yer sotish bilan bog‘liq firibgarlik holatlari aniqlangandi.
Izoh (0)