Shavkat Mirziyoyev: “Viloyatlarda perinatal va skrining markazlari yagona klaster sifatida birlashtiriladi”

Prezident Shavkat Mirziyoyev raisligida tibbiyot sohasidagi islohotlarning Sog‘liqni saqlash vazirligi, uning viloyat, tuman va shahar quyi bo‘g‘inlari hamda mahalliy ijro idoralari tomonidan qay darajada amalga oshirilayotganiga bag‘ishlangan videoselektor yig‘ilishi bo‘lib o‘tdi. Bu haqda “Daryo” muxbiri xabar bermoqda.

“Bolalarda kasalliklarni aniqlash uchun ommaviy tibbiy ko‘riklardan voz kechib, har bir hududning xususiyatlari, kasalliklar dinamikasidan kelib chiqib, maqsadli skrininglarni yo‘lga qo‘yish zarur.

Misol uchun, Qoraqalpog‘iston va Xorazmda endokrin va buyrak kasalliklari, Qashqadaryo va Surxondaryoda oshqozon-ichak kasalliklari va kamqonlik, Buxoro va Navoiyda nafas yo‘li kasalliklari bo‘yicha bolalar o‘rtasida manzilli skrining tadbirlari o‘tkazilishi lozim.

Bundan tashqari, Bositxonova (sog‘liqni saqlash vaziri o‘rinbosari) sog‘lom onalikni ta’minlash bo‘yicha mutlaqo yangi vertikal tizimni joriy qilishga mas’ul bo‘ladi.

Buning uchun viloyatlarda perinatal va skrining markazlari yagona klaster sifatida birlashtiriladi va tumangacha tushadigan bo‘g‘in tashkil etiladi. Klaster rahbari onalik masalalariga birlamchi bo‘g‘indagi ayollar maslahatxonasi va ‘tibbiy brigadalar’ shifokori faoliyatini muvofiqlashtirishga shaxsan javob beradi.

Umuman, Bositxonova onalik va bolalikni muhofaza qilish bilan birga, aholi o‘rtasida sog‘lom turmush tarzi masalalariga shaxsan javobgar.

Bundan tashqari, Bositxonovaga onalik va bolalik masalalarida xalqaro tashkilotlar (YuNISEF, Aholishunoslik fondi) grantlarini jalb qilish, mablag‘larni taqsimlash vakolati beriladi hamda shaxsan mas’ul va javobgar bo‘ladi”, – dedi Prezident.