Iqtisodiy tadqiqotlar va islohotlar markazi (CERR) mutaxassislari aprel oyida avtomobil bozorida bo‘lgan o‘zgarishlarni tahlil qildi, deb xabar bermoqda “Gazeta.uz”. Mutaxassislar tahlili avtomobil bozorida talab ketma-ket uchinchi oy barqaror o‘sayotganini ko‘rsatmoqda.
Aprel oyida avtomobil bozorida aholi talabi mart oyiga nisbatan 14,1 foizga oshdi. Avtomobillar savdosining o‘sishi 2020-yil aprel oyiga nisbatan 355,9 foizni, 2019-yilning shu davriga nisbatan 19,6 foizni tashkil etdi.
Ro‘yxatga va qayta ro‘yxatga olingan avtomobillar soni Toshkent shahrida (28,9 foiz), Buxoro (31,4 foiz), Surxondaryo (18,8 foiz), Samarqand (17,8 foiz) viloyatlarida tez sur’atlarda o‘sgan bo‘lsa, Jizzax (6,0 foiz), Xorazm (3,9 foiz) viloyatlarida pasayish kuzatilgan.
2021-yil yanvar—aprel oylarida deyarli 60 mingta yangi avtomobil ro‘yxatdan o‘tkazilgan. Ularning 2,9 mingtasi (4,9 foizi) — “inomarka”lardir.
Chet elda ishlab chiqarilgan avtomobillar eng ko‘p sotilgan hududlar Toshkent shahri (yangi avtomobillarning 11,8 foizi), Toshkent (5,6 foizi), Samarqand (3,3 foizi) va Xorazm (2,7 foizi) viloyatlari bo‘ldi.
CERR mutaxassislari prognozlariga ko‘ra, O‘zbekistonda avtomobillar bozorida keyinga qoldirilgan talab bilan belgilanadigan o‘sish kutilmoqda. Oldi-sotdi shartnomalari soni o‘sishda davom etadi va mahalliy rekordlar o‘rnatilishi mumkin, lekin narxlarda keskin o‘sish bo‘lmaydi.
Izoh (0)