Shavkat Mirziyoyev: “Tibbiyot sohasidagi darsliklarning aksariyati xalqaro standartlarga umuman javob bermaydi”

2021-yilda ordinatura va magistraturada o‘qiyotgan 30 nafar iqtidorli yoshlar nufuzli xorijiy tibbiyot markazlariga malaka oshirishga yuboriladi. Bu haqda 18-may kuni Prezident Shavkat Mirziyoyev raisligida o‘tkazilgan yig‘ilishda davlat rahbari so‘z yuritdi, deya xabar bermoqda “Daryo” muxbiri.

“Sog‘liqni saqlash vaziri Xojiboyev vazirlik faoliyatini umumiy boshqarish bilan bir qatorda ta’lim, fan, innovatsiya, kadrlarni tayyorlash va qayta o‘qitish yo‘nalishlarida jiddiy o‘zgarishlarni amalga oshirishi zarur.

Misol uchun, tibbiyot sohasidagi ta’lim uslublari bundan 30-40 yillar avval tasdiqlangan va darsliklarning aksariyati xalqaro standartlarga umuman javob bermaydi.

Shuningdek, 11 ta tibbiyot oliygohi va 17 ta ixtisoslashgan markazda jami 7 mingdan ziyod xodim ishlasa-da, ulardan bor-yo‘g‘i 336 nafari ilmiy ish qilmoqda, doktorlik dissertatsiyasi atigi 29 ta. Oqibatda ulardagi ilmiy salohiyat 34 foizni tashkil etib, ayrim oliygohlarda bu ko‘rsatkich kamayib bormoqda. Shu bois Xojiboyev 11 ta tibbiyot oliygohni transformatsiya qilishi zarur.

Bu ishlarni Toshkent tibbiyot akademiyasida boshlash, unga Yevropa va boshqa rivojlangan davlatlardan professor-o‘qituvchilarni jalb qilish kerak.

Bundan tashqari, akademiyada ilg‘or xorijiy tajriba asosida tibbiyot sohasida boshqaruvchilar hamda yuqori texnologik uskunalar bilan ishlaydigan mutaxassislar tayyorlash bo‘yicha yangi yo‘nalishlarni tashkil etishi lozim.

Shuningdek, 2021-yilda ordinatura va magistraturada o‘qiyotgan 30 nafar iqtidorli yoshlarni nufuzli xorijiy tibbiyot markazlariga malaka oshirishga yuborsin”, – dedi davlat rahbari.

Prezident bosh vazir o‘rinbosari Behzod Musayevga ushbu maqsadlar uchun yangi tashkil etilgan jamg‘armadan mablag‘ ajratish bo‘yicha topshiriq berdi.