Xitoy Everest tog‘iga chiqishni taqiqlab qo‘ydi

Xitoy hukumati Tibet tomondan Everest tog‘iga chiqish uchun avval berilgan ruxsatni bekor qilishga qaror qildi, deb yozmoqda Reuters agentligi.

Mamlakat rasmiylari qo‘shni Nepaldan cho‘qqiga ko‘tarilgan alpinistlar koronavirus tashuvchisi bo‘lishi mumkinligidan xavotirda ekani sababli ushbu qarorni qabul qildi.

Xitoyning rasmiy “Sinxua” agentligi Everestning Tibet tomonidan yopilishi XXR Sport bosh boshqarmasining xabarnomasida tasdiqlanganini ma’lum qildi. Ma’lumot uchun, Everest Xitoy va Nepal chegarasida joylashgan bo‘lib, alpinistlar Jomolungmaga (Everestning ikkinchi nomi) har ikki tarafdan ko‘tariladi.

Avvalroq Tibet tomondan ko‘tariladiganlarni Nepal alpinistlaridan ajratish uchun Yerning eng baland nuqtasida bo‘linish chizig‘ini o‘rnatish masalasi ko‘tarilgan edi. Nepal hukumati pandemiyaning avj olishi xavfini keltirib chiqaruvchi koronavirus alomatlari bo‘lgan alpinistlar sonining ortishi kuzatilayotganini ma’lum qilgandi.

Turizmdan olinadigan katta daromad sababli Nepal bir yillik tanaffusdan keyin yana Everestga ko‘tarilishga ruxsat bergan edi, bir necha hafta o‘tib, norvegiyalik alpinist koronavirus bilan kasallangandi. Shuningdek, Everest cho‘qqisini zabt etishga uringan ikki nafar alpinist vafot etdi va pandemiya boshidan buyon cho‘qqiga chiqish paytida halok bo‘lgan birinchi alpinistlarga aylandi.