AQSh davlat departamentining sobiq xodimi hamda 40-prezident Ronald Reyganning SSSR bo‘yicha norasmiy maslahatchisi bo‘lgan amerikalik yozuvchi Suzanna Massi Rossiya prezidenti Vladimir Putindan Rossiya fuqaroligini so‘radi. Bu haqda yozuvchi NTV telekanaliga bergan intervyusida aytib o‘tdi, deb yozadi “RBK”.
“Men hayotimning ko‘p yillarini Qo‘shma Shtatlar va Rossiya xalqi o‘rtasida do‘stona munosabatlar o‘rnatishga bag‘ishladim. Bugun o‘z faoliyatimni davom ettirish uchun Rossiyada qolishim juda muhim. Agar prezident Vladimir Vladimirovich menga Rossiya fuqaroligini berish imkoniyatini taqdim etsa, bu men uchun sharaf bo‘ladi”, — dedi u.
Rossiya prezidenti matbuot kotibi Dmitriy Peskov yozuvchining iltimosiga izoh berar ekan, fuqarolikni olish uchun “ma’lum byurokratik jarayonlardan o‘tish lozim”ligini aytdi.
Suzanna Massi 60-yillarning oxirlarida SSSR va Rossiya tarixini o‘rganishni boshlagan, shundan so‘ng u “Qaqnus mamlakati” kitobini yozgan. “TASS”ga bergan intervyusida u siyosiy vaziyatni emas, balki rus xalqini yaxshi bilgani tufayli Reyganning norasmiy maslahatchisiga aylanganini aytdi.
1954—1990-yillarda Massi chor Rossiyasini o‘rgangan tarixchi Robert Massi bilan turmush kechirdi. 2019-yilda Robert Massi 90 yoshida vafot etdi.
Izoh (0)