Jons Hopkins universiteti ma’lumotlariga ko‘ra, dunyo bo‘yicha COVID-19’ni yuqtirib olganlar soni 163 112 264 kishiga yetdi. Kasallanganlar soni bo‘yicha AQSh (32,9 million), Hindiston (24,9 million), Braziliya (15,6 million), Fransiya (5,9 million) va Turkiya (5,1 million) yetakchilik qilmoqda. Butun dunyoda koronavirus oqibatidagi o‘limlar soni 3 380 353 tani tashkil qilmoqda.
Ekspertlar issiq ob-havoning COVID-19 tarqalishiga ta’sirini baholadi. Har bir virusning o‘z uchun “qulay harorat” bo‘ladi, issiq va quruq havoning COVID-19 bilan kasallanish darajasining o‘sishiga ta’siri haqida gapirish noto‘g‘ri, deya ma’lum qildi rossiyalik infeksionist shifokor, “Lider-Meditsina” tibbiy markazi bosh shifokori Yevgeniy Timakov.
Uning fikriga ko‘ra, virusning yashovchanligiga havoning namligi ta’sir qiladi. “Agar havoning yuqori haroratiga yuqori darajadagi namlik hamrohlik qilsa, bu xavfli bo‘lishi mumkin, chunki virusli suspenziyalarning (qattiq jism zarralari muallaq yurgan suyuqlik yoki gaz) havoda uzoq vaqt bo‘lishi kasallanish darajasining o‘sishiga imkoniyat yaratadi”, — dedi virusolog.
Yuqori darajada insolyatsiya (quyosh nurlarining xonaga tushish darajasi) sharoitida virus faolligi pastroq bo‘ladi. Ammo u odamlar ko‘p bo‘lib yig‘ilgan vaqtda tez tarqaladi.
“Shilliq qavatning qurib ketishiga kelsak, megapolislar aholisining katta qismida shilliq qavat shundoq ham qurib ketgan, bu ko‘chada ob-havoning qandayligiga bog‘liq emas.. Hamma joyda konditsionerlar ishlaydi, ular havoni quritadi, jamoat transportida ham havo doim quruq bo‘ladi”, — deya qo‘shib qo‘ydi Timakov.
Virusolog, Moskva davlat universiteti professori, biologiya fanlari doktori Aleksey Agranovskiy ma’lum qilishicha, COVID-19 kasallanganlar tomonidan yo‘talib chiqarilgan balg‘am zarralari orqali tarqatiladi. Harorat yuqori bo‘lib, namlik past bo‘lganida virus faolligini tezroq yo‘qotadi, balg‘am zarrachalari esa qattiq yuzalarda tezroq quriydi. COVID-19 yuqishi uchun eng qulay sharoitlar — odamlarning yopiq, yaxshi shamollatilmaydigan binolarda to‘planishi”, — deb hisoblaydi virusolog.
Agranovskiyning qayd etishicha, jaziramada odamlar uyda ko‘p o‘tirmaydi va ko‘proq vaqtini toza havoda o‘tkazadi, bu esa virus yuqishi xavfini kamaytiradi.
Britaniya qirollik oilasi a’zosi, Yelizaveta II ning amakivachchasi Kent shahzodasi Mayklning rafiqasi — Kent malikasi Mariya Kristina fon Reybnits AstraZeneca vaksinasi bilan koronavirusga qarshi emlanganidan keyin, unda tromboz aniqlandi.76 yoshli fon Reybnits 2021-yil boshida vaksina olgan. Biroz vaqtdan keyin uning salomatligi shifokorlarda xavotir uyg‘ota boshlagan, unda tromboz aniqlangan.
Koronavirusga qarshi emlanish va tromblar hosil bo‘lishi o‘rtasidagi bevosita aloqa aniqlanganicha yo‘q. Bir oydan buyon Kent malikasi uyda davolanmoqda.
Tayvanda pandemiya boshidan buyon eng qat’iy cheklovlar joriy qilindi. Orolda 28-maygacha kinoteatrlar va ko‘ngilochar muassasalar yopiq bo‘ladi. Bino ichida besh, ochiq havoda esa o‘n kishi bo‘lib to‘planish mumkin. Bundan tashqari, aholi ochiq havoda ham niqob taqishi, iloji boricha uydan o‘qishi va ishlashi kerak.Shu paytgacha pandemiyadan deyarli zarar ko‘rmagan Tayvanda kasallanish holatlarining keskin ko‘payishi kuzatilmoqda. So‘nggi bir kunda 207 kishi koronavirusni yuqtirib oldi va umumiy kasallanganlar soni 1682 kishiga yetdi. COVID-19 oqibatidagi o‘limlar esa 12 tani tashkil qilmoqda.
Shuningdek:- Estoniyada 17-maydan koronavirusga qarshi ommaviy emlash boshlandi: 16 yoshdan oshgan istalgan shaxs vaksina olishi mumkin. 50 yoshdan oshganlarga AstraZeneca, 50 yoshga yetmaganlarga Pfizer, Modern ava Janssen vaksinalari yuboriladi.
- Buyuk Britaniyada koronavirus pandemiyasi tufayli joriy qilingan cheklovlarni bekor qilishning uchinchi bosqichi boshlandi. 17-maydan mehmonxona va hostellar ochiladi; teatr, konsert zallari, muzey va kinoteatrlar ochilishi mumkin; tomoshabinlar ishtirokidagi sport tadbirlariga ruxsat beriladi; pab, bar va restoranlar ochiq havoda va masofa saqlagan holatda mijozlarga xizmat ko‘rsatishi mumkin; universitet va maktablarga qatnab o‘qishga ruxsat beriladi.
Izoh (0)