Abdujabbor Aziz Rahmonzoda Tojikistonning O‘zbekistondagi yangi elchisi etib tayinlandi. 13-may kuni O‘zbekiston tashqi ishlar vaziri Abdulaziz Komilov undan ishonch yorliqlari nusxasini qabul qilib oldi.
TIV matbuot xizmatining xabar berishicha, Abdulaziz Komilov uni O‘zbekistonda faoliyat boshlagani bilan tabrikladi hamda ushbu yuqori va mas’uliyatli lavozimda muvaffaqqiyatlar tiladi.
Uchrashuv chog‘ida ikki birodar mamlakat yetakchilarining siyosiy irodasi sababli bugun kunda do‘stlik, yaxshi qo‘shnichilik va strategik sheriklikka asoslangan O‘zbekiston–Tojikiston munosabatlari jadal rivojlanayotgani, yangi yo‘nalishlarni qamrab olib, amaliy mazmun bilan boyiyotgani qayd etildi. Tomonlar oliy va yuqori darajada bo‘lib o‘tadigan tadbirlar jadvalini ko‘rib chiqdi hamda mintaqaviy va xalqaro masalalar bo‘yicha fikr almashdi.
Eslatib o‘tamiz, Abdujabbor Aziz Rahmonzoda Tojikiston prezidenti Emomali Rahmonning 4-maydagi farmoni bilan Tojikistonning O‘zbekistondagi favqulodda va muxtor elchisi etib tayinlangandi. U tayinlovga qadar prezidentning ijtimoiy rivojlanish va jamoatchilik bilan aloqalar bo‘yicha yordamchisi lavozimida ishlab kelgan.
Tojikistonning 2016-yildan beri O‘zbekistondagi elchisi bo‘lib ishlab kelgan Sodiq Imomiy aprel oyida mamlakatdagi missiyasini yakunladi. U 22-aprel kuni Abdulaziz Komilov qabulida, 23-aprel kuni esa Shavkat Mirziyoyev qabulida bo‘ldi.
Izoh (0)