Abdulaziz Komilov O‘zbekistondagi missiyasini yakunlayotgan Tojikiston elchisini qabul qildi
O‘zbekiston tashqi ishlar vaziri Abdulaziz Komilov 22-aprel kuni mamlakatda diplomatik missiyasini yakunlayotgan Tojikiston elchisi Sodiq Imomini qabul qildi. Bu haqda TIV matbuot xizmati xabar berdi.
Vazir elchining ikki mamlakat o‘rtasidagi hamkorlikdagi shaxsiy hissasini yuqori baholadi. Tomonlar O‘zbekiston–Tojikiston munosabatlarini rivojlantirish va yuqori darajadagi tashriflar davomida erishilgan kelishuvlarni amalga oshirishni muhokama qildi.
Ma’lumot uchun, Sodiq Imomi 2016-yildan beri Tojikistonning O‘zbekistondagi elchisi bo‘lib ishlab kelayotgan edi.
Bundan avval Abdulaziz Komilov Rossiyaning O‘zbekistondagi yangi elchisini qabul qilgani, Qatar tomoni O‘zbekistonning Afg‘onistondagi tinchlik jarayonini qo‘llab-quvvatlash borasidagi sa’y-harakatini yuqori baholagani hamda Abdulaziz Komilov Dohada “Tolibon” harakatining siyosiy vakolatxonasi rahbari bilan uchrashgani haqida xabar berilgandi.
