Samarqand viloyatida шchki ishlar organlari faoliyatini muvofiqlashtirish bo‘limi tezkor xodimiga pora berayotgan shaxs ushlandi, deya xabar qilmoqda IIV.
Ma’lum qilinishicha, 2021-yil 10-may kuni Samarqand shahri bo‘yicha IIO FMB tezkor xodimi Samarqand shahar Qorasuv maskani “B.Yalangtush” mahallasida o‘zini shubhali tutgan A. ismli shaxs yonini xolislar ishtirokida shaxsiy tintuvdan o‘tkazgan vaqtida egnida bo‘lgan kiyimining chap cho‘ntagidan 2,16 gramm og‘irlikdagi marixuana giyohvandlik moddasi borligi aniqlanib, tegishli tartibda rasmiylashtirilgan.
Fuqaro o‘ziga nisbatan to‘plangan hujjatlarni ro‘yxatdan o‘tkazmaslik va tergov organi tomonidan qonuniy chora ko‘rmaslik evaziga tezkor xodimga 2000 AQSh dollarini pora sifatida taklif qilgan.
Xodim unga bir necha marotaba pora berish jinoyat ekanligini tushuntirishiga qaramasdan pora taklif qilishda davom etgan.
Tezkor xodim holat yuzasidan viloyat IIB boshlig‘i nomiga bildirgi bilan murojaat qilgan.
Bildirgiga asosan, 11-may kuni IIV O‘XB Samarqand viloyati bo‘yicha bo‘limi, Samarqand shahri bo‘yicha IIO FMB, Samarqand shahar prokuraturasi xodimlari tomonidan tezkor tadbir o‘tkazilib, 1987-yilda tug‘ilgan, Kattaqo‘rg‘on shahar Amir Temur ko‘chasida yashovchi Yu.A. ishini ijobiy hal qilib berish evaziga IIB xodimiga 2000 AQSh dollari miqdoridagi pullarni pora tariqasida bergan vaqtida tadbir ishtirokchilari tomonidan daliliy ashyolar bilan ushlangan.
Holat yuzasidan Yu.A.ga nisbatan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilib, dastlabki tergov harakatlari olib borilmoqda.
Bundan avval Qoraqalpoq davlat universitetiga o‘qishga kiritib qo‘yish uchun 5 ming dollar so‘ragan shaxslar qo‘lga olingani, Jizzax shahar hokimining birinchi o‘rinbosari vazifasini bajaruvchi shaxs 2 ming dollar pora olayotganda ushlangani hamda Chiroqchida fuqarolarni Janubiy Koreyaga jo‘natishni va’da qilib, ulardan 1750 dollar olgan shaxsga jinoiy ish ochilgani haqida xabar berilgandi.
Izoh (0)