Texnik paxta chigitlarining birja narxi 31,2 foizga pasaygan va 12-may holatiga ko‘ra bir tonna uchun o‘rtacha 3 million 403,9 ming so‘mni tashkil etgan. Bu haqda 6—12-may kunlari O‘zbekiston tovar-xomashyo birjasida o‘tkazilgan ochiq savdo natijalari bo‘yicha ma’lumotda ma’lum qilindi.
Qayd etilishicha, 2021-yil 6—12-may kunlari O‘zbekiston tovar-xomashyo birjasida o‘tkazilgan ochiq birja savdolari yakunlariga ko‘ra texnik paxta chigitining birjadagi narxi 31,2 foizga pasayib, 12-may holati bo‘yicha mahsulotning bir tonnasi uchun o‘rtacha 3 million 403,9 ming so‘mni tashkil etdi.
Ko‘rib chiqilayotgan davrda birja savdolariga sotuvchi korxonalar tomonidan 7961 tonna paxta chigiti qo‘yildi va ulardan 5903 tonnasi, ya’ni 74,1 foizi sotildi.
Texnik paxta chigitining birjadagi narxlari pasayishiga uning boshlang‘ich narxlarini sotuvchi korxonalar, ya’ni paxta-to‘qimachilik klasterlari tomonidan pasaytirilganligi o‘z ijobiy ta’sirini o‘tkazgan.
Xususan, o‘tgan davrda paxta-to‘qimachilik klasterlari birja savdolariga qo‘yiladigan paxta chigitining boshlang‘ich narxlarini mahsulotning bir tonnasi uchun o‘rtacha 4 million 781 ming 900 so‘mdan 2 million 933 ming 300 so‘mgacha, ya’ni 38,7 foizga pasaytirdi.
Texnik paxta chigiti narxining pasayishi oqibatida paxta yog‘ining boshlang‘ich qiymati va birjadagi narxlari ham pasaydi. Xususan, o‘tgan davrda paxta yog‘ining boshlang‘ich narxi o‘rtacha 5,3 foizga, birja savdolari natijasida shakllangan narxi esa mos tarzda 11,3 foizga pasayib, bugungi kunda mahsulotning bir tonnasi uchun 14 million 739,3 ming so‘mni tashkil qiladi.
Eslatib o‘tamiz, bundan avval Monopoliyaga qarshi kurashish qo‘mitasi birjada texnik chigitning boshlang‘ich narxlarini kelishib, sun’iy oshirish alomatlari bilan 34 ta paxta klasteriga nisbatan ish qo‘zg‘atgan edi.
Izoh (0)