Qoraqalpoq davlat universitetiga o‘qishga kirib qo‘yishni va’da qilib, buning evaziga 5 ming AQSh dollari so‘ragan uch nafar shaxs qo‘lga olindi. Bu haqda Bosh prokuratura huzuridagi departament matbuot xizmati xabar berdi.

Ma’lum qilinishicha, Bosh prokuratura huzuridagi departament hamda DXXning Qoraqalpog‘iston Respublikasi boshqarmalari tomonidan tezkor tadbir o‘tkazilgan. Tadbirda I.J., J.X. va D.X. ismli shaxslar oldindan til biriktirib, fuqaro D.dan uni Qoraqalpoq davlat universitetining Jismoniy tarbiya fakultetiga tanishlari orqali o‘qishga kiritib qo‘yish evaziga 5 ming dollar talab qilgan. Ular kelishilgan mablag‘ning 3 mingini AQSh dollari, qolgan qismini 20 million so‘m ko‘rinishida firibgarlik yo‘li bilan olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28-,211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Qashqadaryoda o‘qishga kiritib qo‘yishni va’da qilib, 22 kishini 22,5 ming dollarga chuv tushirgan firibgarlar ushlangani, Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10 500 dollar pul olgan ayol qo‘lga olingani to‘g‘risida xabar berilgandi.