O‘zbekiston Oliy sudi tarix fanlari bo‘yicha falsafa doktori Bahrom Irzayevning qatag‘onga uchragan, bosmachi tamg‘asini olgan, aslida millatparvar bo‘lgan o‘zbek farzandlari nomlari hali hanuz oqlanmayotgani borasidagi fikrlariga munosabat bildirdi.
“Rost24” saytida “Oliy sudga e’tiroz: Nega 30 yildan buyon millatimiz qahramonlarini oqlamayapsiz?” nomli maqola e’lon qilingan bo‘lib, unda olim, tarix fanlari bo‘yicha falsafa doktori Bahrom Irzayev bilan qatag‘onga uchragan, bosmachi tamg‘asini olgan, aslida millatparvar bo‘lgan fuqarolar nomlari hali hanuz oqlanmayotgani yuzasidan suhbat uyushtirilgan.
Olimning ta’kidlashicha, bu kabi holat mustaqillikdan so‘ng Markaziy Osiyo mamlakatlari orasida faqat O‘zbekistonda kuzatilmoqda, shu vaqtgacha Qirg‘iziston, Qozog‘istonda turkistonliklar millat qahramoni sifatida tan olinib, ular haqida bir nechta kitoblar, filmlar ishlangani qayd etilgan.
Oliy sud tomonidan reabilitatsiya qilinmagan qatag‘on qurbonlarining nomlarini oqlash va ularning xotirasini abadiylashtirish borasida zarur chora-tadbirlar belgilab olingan bo‘lib, amaliy sa’y-harakatlar tizimli ravishda davom ettirilmoqda.Ma’lumot o‘rnida shuni aytish mumkinki, O‘zbekiston Prezidentining 2020-yil 8-oktabrdagi “Qatag‘on qurbonlarining merosini yanada chuqur o‘rganish va ular xotirasini abadiylashtirishga doir qo‘shimcha chora-tadbirlar to‘g‘risida”gi farmoyishi ijrosini ta’minlashga Oliy sud tomonidan alohida e’tibor qaratilmoqda.
Chunonchi, mustabid sovet tuzumi davrida qatag‘on qurboni bo‘lgan va hozirgi kunga qadar oqlanmagan shaxslarning jinoyat ishlari amaldagi qonunchiligimizga muvofiq o‘rganib chiqilayotgani ma’lum qilinadi.
O‘zbekiston Oliy sudi
Izoh (0)