“ASKUE tizimini 1-avgustgacha 100 foiz ishga tushirish zarur” — Shavkat Mirziyoyev

Prezident Shavkat Mirziyoyev energetika tarmog‘i rahbarlariga elektr energiya ta’minoti bo‘yicha belgilangan talabni bajarish lozimligini uqtirdi. Bu haqda davlat rahbari raisligida 12-may kuni o‘tkazilgan videoselektor yig‘ilishida aytib o‘tildi, deya xabar bermoqda “Daryo” muxbiri.

Ayni paytda Prezident Shavkat Mirziyoyev raisligida o‘tkazilayotgan yig‘ilishda davlat rahbari bosh vazir o‘rinbosarlari, vazirlar, viloyat, tuman va shahar hokimlari, tarmoq va bank rahbarlari may—iyun oylarida yo‘l qo‘yilgan qoloqliklarni bartaraf etish uchun qaysi yo‘nalishlarda ishlarni tashkil etishi zarurligini qayd etdi.

Shavkat Mirziyoyevning ta’kidlashicha, iqtisodiy o‘sish uchun, “eng avvalo, asosiy energoresurslar ishlab chiqarish hajmlarini oshirish lozim”. Qayd etilishicha, birinchi chorakda tabiiy gaz qazib chiqarish 1,7 foizga kamaygani ta’sirida 600 ming tonna sement, 55 ming tonna mineral o‘g‘it, 330 million kilovatt soat elektr energiyasi ishlab chiqarish hajmlari ta’minlanmagan.

“Sultonov [energetika vaziri Alisher Sultonov -tahr.] M.Abdullayev ikkinchi chorakda birinchi chorakdagi qoloqlikni bartaraf qilib, 9 milliard kub metr tabiiy hamda 165 ming tonna suyultirilgan gaz ishlab chiqarishni so‘zsiz ta’minlasin. Sultanov, Sh.Xodjayev ‘Issiqlik elektr stansiyalari’, ‘O‘zbekgidroenergo’ bilan birga, sanoat tarmoqlari, tadbirkorlik subyektlari va aholi ehtiyojlarini to‘la qondirish uchun ikkinchi chorakda jami 15,5 milliard kilovatt elektr ishlab chiqarishi zarur.

Bundan tashqari, Sultonov, Mustafoyev viloyat hokimlari bilan birga, 2021-yil 1-avgustga qadar, mavjud kechikishni to‘liq bartaraf etgan holda ASKUE tizimini 100 foiz ishga tushirishi kerak”, — dedi Shavkat Mirziyoyev.

Avvalroq 2020-yil dekabrida ASKUE (elektr energiyasini hisobga olish va nazorat qilishning avtomatlashtirilgan tizimi) tizimi 2021-yil aprelidan to‘liq ishga tushishi rejalashtirilgani ma’lum qilingan edi. Prezidentning 2018-yil oktabrdagi qarorida esa elektron hisoblagichli abonentlar qamrovini 2021-yil yakunigacha 100 foizga yetkazish vazifasi qo‘yilgandi.

Ma’lumot uchun, elektr energiyasini hisobga olish va nazorat qilishning avtomatlashtirilgan tizimiga jami 7 million 418 mingdan ziyod iste’molchini ulash rejalashtirilgan.