Shavkat Mirziyoyev muammoli kreditlar bo‘yicha mas’ul rahbarlarni tanqid qilib, qarzdorliklarni undirish yuzasidan topshiriq berdi

Prezident Shavkat Mirziyoyev raisligida 12-may, chorshanba kuni o‘tkazilgan yig‘ilishda davlat rahbari muammoli kreditlar haqida so‘z yuritib, mas’ul rahbarlarni tanqid qildi, deya xabar bermoqda “Daryo” muxbiri.

“Sohalar kesimida sanoatda – 3 trillion so‘m, savdo va xizmat ko‘rsatishda – 2,1 trillion so‘m, qishloq xo‘jaligida 1,8 trillion so‘m, qurilishda – 978 milliard so‘m, transport va kommunikatsiyada – 547 milliard so‘mlik muammoli kreditlar vujudga kelgan.

Agar bu pullar iqtisodga qaytsa, qancha foyda bo‘lardi? Agar qaytmasa, bu kreditlarni kimlarga bergansizlar?! Bu pullar qaytishi hozir iqtisodiyotimizga havodek zarur. Bu yil iqtisodiyotimizga misli ko‘rilmagan pul sarfladik.

Hududlar kesimida Jizzax, Samarqand Surxondaryo va Toshkent viloyatlarining har biriga qariyb 1 trillion so‘mdan muammoli kreditlar to‘g‘ri kelmoqda”, — dedi Prezident.

Qayd etilishicha, bu mablag‘larni qaytarishga Bosh vazir o‘rinbosarlari, viloyat, tuman va shahar hokimlari, sektor va tijorat banklari rahbarlari shaxsan javobgar bo‘ladi.

“Bunda, Umurzoqov – 5 trillion so‘m, Qo‘chqorov – 4,2 trillion so‘m, Ramatov – 2,2 trillion so‘m, G‘aniyev – 1,8 trillion so‘m, Musayev – 120 milliard so‘m, Abduhakimov – 103 milliard so‘mning qaytimiga tarmoq va hudud rahbarlari bilan birdek javob beradi.

Bosh vazir o‘rinbosarlari viloyat hokimlari bilan birga, ikki hafta muddatda o‘z kompleksiga kiruvchi korxonalarning muammoli qarzdorligini to‘liq xatlovdan o‘tkazib, ikkinchi chorak yakuniga qadar ularning kamida 25 foizini, yil yakuniga qadar esa 100 foiz qaytimini ta’minlash bo‘yicha hududlar va tarmoqlar kesimida grafikni tasdiqlasin”, — dedi davlat rahbari.

Shavkat Mirziyoyev oilaviy tadbirkorlik dasturlari doirasidagi muammoli qarzdorliklarni undirish bo‘yicha ham so‘z yuritdi.

“Oilaviy tadbirkorlik dasturlari bo‘yicha 466 milliard so‘mlik muammoli qarzdorliklarni undirishga Zoxidov, Xolxo‘jayev viloyat, tuman va shahar hokimlari, sektor rahbarlari bilan birga mas’ul va javobgar bo‘ladi.

Qoraqalpog‘iston – 14 milliard so‘m, Andijon – 68 milliard so‘m, Buxoro – 13 milliard so‘m, Jizzax – 27 milliard so‘m, Qashqadaryo – 39 milliard so‘m, Navoiy – 24 milliard so‘m, Namangan – 67 milliard so‘m, Samarqand – 44 milliard so‘m, Surxondaryo – 35 milliard so‘m, Sirdaryo – 48 milliard so‘m, Toshkent viloyati – 19 milliard so‘m, Farg‘ona – 41 milliard so‘m, Xorazm – 16 milliard so‘m va Toshkent shahri – 10 milliard so‘m”, — dedi Prezident.