“Agar kimdir siyosiy partiya tuzmoqchi bo‘lsa, uning yo‘lida to‘siqlar bo‘lmasligi kerak” — AQShning O‘zbekistondagi elchisi

AQSh elchisi Deniyel Rozenblyum “Xabar.uz” nashriga bergan intervyusida 2021-yilning oktabr oyida O‘zbekistonda bo‘lib o‘tadigan prezidentlik saylovlari masalasiga ham to‘xtalib o‘tdi.

“Saylovlar erkin, adolatli va raqobatdosh bo‘lishi chindan demokratik jamiyat belgilaridan sanaladi. Demokratiya hamisha rivojlanib turadigan jarayon, evolyutsiya va saylovlar uning muhim bir qismidir. U orqali xalqlar o‘z rahbarlarini saylaydi.

Saylovlar adolatli tashkil etilishi, unda raqobatlashmoqchi bo‘lganlarga imkon va barcha sharoitlar bo‘lishi juda muhim. Agar kimdir siyosiy partiya tuzmoqchi bo‘lsa, uning yo‘liga qo‘yiladigan to‘siqlar bo‘lmasligi kerak.

Shuni bilamanki, kelayotgan saylovlarda O‘zbekistonda xalqaro hamjamiyat ham ishtirok etadi. AQSh YXHT monitoring ishida qatnashadi va saylovlarni yaqindan kuzatib boradi. Biz Markaziy saylov komissiyasiga saylovlarni o‘tkazishda texnik ko‘mak berish niyatidamiz va jarayonni yaqindan kuzatib boramiz. Demokratiya bir evolyutsiya demakdir va u to‘g‘ri yo‘nalishga ega bo‘lmog‘i muhimdir. Biz buni O‘zbekistondan kutib qolamiz”, — deydi AQSh elchisi.

Eslatib o‘tamiz, Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida 2021-yilda o‘tkaziladigan “davlat va xalq hayotidagi muhim siyosiy hodisa” — prezidentlik saylovlari masalasiga to‘xtalib o‘tgandi. O‘shanda Shavkat Mirziyoyev Markaziy saylov komissiyasi “bo‘lajak saylovlarning milliy qonunchilik va umume’tirof etilgan xalqaro demokratik tamoyillar asosida yuksak saviyada tashkil etilishiga alohida e’tibor qaratishi” lozimligini ta’kidlagandi.