6-maydan 7-may kuniga o‘tar kechasi soat 01:00 dan 03:30 larga qadar Andijon viloyati Xonobod shahrining “Teyit” va “Xidirsha” MFYlarida kuchli sel kelishi tufayli 700 ga yaqin xonadon zararlandi. Bu haqda IIV YHXBB axborot xizmati xabar berdi.
“Yog‘ingarchilik sababli Qirg‘iz kanalining toshishi oqibatida bir oilaning 2 nafar voyaga yetmagan 2013 va 2018-yilda tug‘ilgan farzandlari selda oqib ketib, vafot etgan”, — deyiladi xabarda.
Bosh prokuratura matbuot xizmati mazkur holat yuzasidan Xonobod shahar prokuraturasi tomonidan tergovga qadar tekshiruv harakatlari olib borilayotganini ma’lum qildi.
Favqulodda vaziyatlar vazirligi matbuot xizmatining xabar qilishicha, Qirg‘iz kanali orqali oqib kelgan sel oqimlari Xonobod shahri va Qo‘rg‘ontepa tumanidagi ko‘chalar orqali 278 ta turar joylarning yashash xonadonlari va hovlisiga kirgan. Hozirda tabiiy ofatni bartaraf etish uchun Andijon viloyati IIB YHXB xodimlari tomonidan zarur kuch va vositalar hamda maxsus texnikalar jalb etilmoqda.
Shuningdek, Namangan viloyatining Pop, Kosonsoy va Chust tumanlarida yog‘gan kuchli yomg‘ir sababli Pop tumani “Vodiy” MFY hududida sel oqimlari kuzatilgan. Pop tumani hududidan o‘tuvchi 4P-125 Namangan—Toshkent avtomobil yo‘lining 15-16 kilometrida yo‘l yoqasining yuvilishi, Angren—Pop elektrlashtirilgan temiryo‘lining 103—106 kilometrida temiryo‘l tarmog‘ining taxminan 3 metr qismida tuproq massasining yuvilishi ro‘y bergan.
Avvalroq Samarqandda kuchli yomg‘ir sababli Damas soyga tushib ketgani to‘g‘risida xabar berilgandi.
Izoh (0)