6 майдан 7 май кунига ўтар кечаси соат 01:00 дан 03:30 ларга қадар Андижон вилояти Хонобод шаҳрининг «Тейит» ва «Хидирша» МФЙларида кучли сел келиши туфайли 700 га яқин хонадон зарарланди. Бу ҳақда ИИВ ЙҲХББ ахборот хизмати хабар берди.
«Ёғингарчилик сабабли Қирғиз каналининг тошиши оқибатида бир оиланинг 2 нафар вояга етмаган 2013 ва 2018 йилда туғилган фарзандлари селда оқиб кетиб, вафот этган», — дейилади хабарда.
Бош прокуратура матбуот хизмати мазкур ҳолат юзасидан Хонобод шаҳар прокуратураси томонидан терговга қадар текширув ҳаракатлари олиб борилаётганини маълум қилди.
Фавқулодда вазиятлар вазирлиги матбуот хизматининг хабар қилишича, Қирғиз канали орқали оқиб келган сел оқимлари Хонобод шаҳри ва Қўрғонтепа туманидаги кўчалар орқали 278 та турар жойларнинг яшаш хонадонлари ва ҳовлисига кирган. Ҳозирда табиий офатни бартараф этиш учун Андижон вилояти ИИБ ЙҲХБ ходимлари томонидан зарур куч ва воситалар ҳамда махсус техникалар жалб этилмоқда.
Шунингдек, Наманган вилоятининг Поп, Косонсой ва Чуст туманларида ёғган кучли ёмғир сабабли Поп тумани «Водий» МФЙ ҳудудида сел оқимлари кузатилган. Поп тумани ҳудудидан ўтувчи 4P-125 Наманган—Тошкент автомобиль йўлининг 15-16 километрида йўл ёқасининг ювилиши, Ангрен—Поп электрлаштирилган темир йўлининг 103—106 километрида темир йўл тармоғининг тахминан 3 метр қисмида тупроқ массасининг ювилиши рўй берган.
Аввалроқ Самарқандда кучли ёмғир сабабли Damas сойга тушиб кетгани тўғрисида хабар берилганди.
Изоҳ (0)