Ijtimoiy tarmoqlarda Qashqadaryo viloyati Chiroqchi tumani hokimligi oldida bir yigit tomonidan kaltaklangan qiz videosi tarqalgan, viloyat prokuraturasi holat bo‘yicha jinoyat ishi qo‘zg‘atilganini ma’lum qilgandi. O‘zA voqeaga nima sabab bo‘lganini aniqladi.
24-aprel kuni soat 22:00 larda Chiroqchi tumani Mustaqillik ko‘chasidagi avtoshohbekatda fuqaro T.N.ni o‘ziga notanish bo‘lgan shaxs urib, tan jarohati yetkazgan.
Ma’lum bo‘lishicha, asli shahrisabzlik bo‘lgan 35 yoshli ayol tanishinikiga 2 yoshli qizini sutdan ajratish uchun borgan. Uning uyida mehmon sifatida biroz o‘tirib qolgan va kechroq yo‘lga chiqqan.
“Toshkent ‘stoyanka’siga kelganimda qo‘liga ‘butulka’ ko‘tarib olgan bir yigit shaxsiyatimga tegadigan gap aytdi. U gap menga juda og‘ir botdi va undan ‘aytgan gapingni isbotlab ber’ deya izoh so‘radim. Bu holatga guvoh bo‘lib turgan shu yerdagi haydovchi yigitlarga ham qoyil qolmadim.
Haligi yigitni gij-gijlab ko‘tar-ko‘tar qildi. Tomoshabin bo‘lishdi. Keyin tortishuvimiz janjalga aylanib ketdi. Dabdurustdan meni urib-tepib ketdi. Men profilaktika inspektoriga qo‘ng‘iroq qilishini aytib, telefonimni dugonamga berdim. Uning ham sochlaridan tortib urib tashladi”, — degan u.
Ayol 2-may kuni o‘ng quloq atrofidagi og‘riq, quloqning yaxshi eshitmasligi va bosh og‘rig‘i bilan shikoyat qilgan va Chiroqchi tumani tibbiyot birlashmasiga qarashli jarrohlik bo‘limiga yotqizilgan. Bo‘lim bosh shifokori Abduvohid Eshquvvatovning so‘zlariga ko‘ra, bemorda kerakli muolajalar o‘tkazilgan va hozirda uning ahvoli qoniqarli.
Ayni paytda Chiroqchi tumani ichki ishlar organlari faoliyatini muvofiqlashtirish boshqarmasida vaqtinchalik hibsda ushlab turilgan ayolni urgan erkak X.A. o‘sha kuni spirtli ichimlik iste’mol qilgani uchun o‘zini boshqarib tura olmagani, qilgan ishidan pushaymon ekanini bildirgan.
“Tungi vaqtda katta ko‘cha bo‘ylab ketayotgandim, ozgina spirtli ichimlik ham iste’mol qilgandim. Yonimdan o‘tib borayotgan ikki nafar xotin-qizlardan biri tanishdek ko‘rindi. Ulardan biriga ‘qandaysan’ deya gap otdim. Ular menga javob qaytardimi yo qaytarmadimi hozir aniq yodimda yo‘q, o‘tib ketdi. Toshkent shahriga mashinalar qatnaydigan bekatga yetib qolganimda haliga ayollardan biri orqamdan yetib kelib, ko‘ylagimdan tortib, ‘sen kimga gapiryapsan’ deb baqirib ketdi. Men esa senga gapirmadim, sherigingga gapirdim, deya javob qaytardim.
U yoqamdan tortib meni siltab urib ketdi. Jahlim chiqibdi, men ham yuziga tarsaki tortib yubordim. Sherigi qo‘liga tosh olib menga o‘qtaldi. Ungacha atrofdagilar yig‘ilib tomosha qila boshladi. Ular esa borgan sari menga yopishib, baland ovozda baqirib janjal qilib ketdi. Keyin nima bo‘lganini bilmayman, o‘zimni boshqarib tura olmadim. Qilgan ishimdan qattiq pushaymonman”, — degan u.
Avvalroq Qashqadaryoda o‘quvchiga tanbeh bergan homilador o‘qituvchi kaltaklangani, ayol homila tushish xavfi bilan tug‘ruqxonaga yotqizilgani haqida xabar berilgan edi.
Izoh (0)