Maktabgacha ta’lim vazirligi bog‘chalarda bolalar ta’minoti uchun ota-onalar to‘lovi miqdori oshirilganini oziq-ovqat mahsulotlarini narxining oshgani bilan izohladi. Bu haqda 4-may kuni AOKAda o‘tkazilgan brifingda vazirlik matbuot xizmati ma’lum qilindi.
Eslatib o‘tamiz, 2021-yil 1-maydan davlat maktabgacha ta’lim muassasa (MTM)larida bolalar ta’minoti uchun ota-onalar to‘lovining yangi — o‘rtacha 15 foizga oshirilgan miqdorlari joriy etildi.
Maktabgacha ta’lim vazirligi matbuot xizmatining ma’lum qilishicha, ota-onalar tomonidan to‘langan pul mablag‘larining katta qismi bolalarning ovqatlanishiga, shuningdek, foydaning 5 foizdan ortiq bo‘lmagan qismi bog‘chalarning moddiy-texnik bazasini yaxshilashga, birinchi navbatda, sanitar-gigiyenik vositalarni xarid qilishga yo‘naltiriladi.
Davlat statistika qo‘mitasining ma’lumotlariga ko‘ra, 2020-yilda oziq-ovqat mahsulotlarining narxi o‘rtacha 15,3 foizga oshgan, xususan, non narxi 15,2 foizga, tovuq, mol go‘shti va baliq — 18,1 foizga, sut mahsulotlari — 11,5 foizga, tuxum — 37,6 foizga, mevalar, sabzavolar va kartoshka — 11,9 foizga, yog‘ va moylar — 27 foizga, shakar, choy va boshqa mahsulotlar — 11,8 foizga.
Bundan tashqari, vazirlikning ma’lum qilishicha, ota-onalar tomonidan har oyda to‘lanadigan to‘lovlar Toshkent shahri, viloyatlar markazlari, viloyat bo‘ysunuvidagi shaharlar va boshqa joydagi davlat MTMlari uchun tabaqalashtirilgan holda belgilangan. Bolalar bog‘chasi uchun eng yuqori miqdorlar poytaxtda amal qiladi — 246 ming so‘m, eng past ko‘rsatkich tumanlarda — 167 ming so‘m.
Shuningdek, 2023-yilning 1-yanvariga qadar Navoiy viloyati Nurota tumani hamda Surxondaryo viloyati Qiziriq tumanidagi davlat maktabgacha ta’lim muassasalarida ota-onalar har oyda bolalar ta’minoti uchun o‘rnatilgan tarifning ikki baravar kam miqdorida haq to‘laydi.
Bundan tashqari, ota-onalarning har oylik to‘lovi Qoraqalpog‘iston Respublikasi va Xorazm viloyatidagi barcha maktabgacha ta’lim tashkilotlarida, shuningdek, boshqa viloyatlardagi ayrim bog‘chalarda ham o‘rnatilgan tarifning 50 foizi miqdorida to‘lanadi.
Izoh (0)